بھارت میں رہنے والے کینڈین شہریوں کے سر پر بڑا خطرہ منڈلانے لگا

کینیڈا(مانیٹرنگ ڈیسک) بھارت سے حالیہ کشیدگی کے پیش نظر کینیڈا نے بھارت میں اپنے شہریوں کے لیے نئی سفری ہدایت جاری کرتے ہوئے کینیڈین شہریوں کو محتاط رہنے کی ہدایت کی ہے۔

انٹرنیشنل میڈیا کے مطابق کینیڈین حکومت کی جانب سے جاری بیان میں کہا گیا ہے کہ سوشل میڈیا پر کینیڈا کے خلاف احتجاج اور منفی جذبات کا اظہار کیا جا رہا ہے، بھارت میں کینیڈین شہری چوکس اور محتاط رہیں۔ خیال رہے کہ کینیڈا میں سکھ علیحدگی پسند رہنما ہردیپ سنگھ نجرکو جون میں قتل کردیا گیا تھا۔گزشتہ دنوں کینیڈین وزیراعظم جسٹن ٹروڈو نے کہا تھا کہ سکھ رہنما کے قتل میں بھارتی ایجنٹ ملوث ہیں۔ کینیڈین وزیراعظم کے بیان کے بعد سے دونوں ممالک کے درمیان سفارتی کشیدگی پیدا ہوگئی ہے۔ اس سے قبل بھارت بھی کینیڈا میں بھارتی شہریوں کے لیے سفری ہدایات جاری کر چکا ہے۔