بھارت میں مذہبی تہوار جیوت پتریکا 37بچوں سمیت 46افراد کو نگل گیا، ہرطرف صف ماتم بچھ گئی
گزشتہ سال بھی اسی تہوار کے دوران 24 گھنٹوں میں 22 افراد ڈوب کر ہلاک ہوگئے تھے' حکومت نے ہلاک ہونے والوں کے لواحقین کیلئے 4 لاکھ بھارتی روپے کا اعلان کیا
بہار(مانیٹرنگ ڈیسک) بھارتی ریاست بہار میں مذہبی تہوار جیوت پتریکا کے دوران 37 بچوں سمیت 46 افراد ڈوب کر ہلاک ہوگئے جس کے بعد تقریباً ہر گھر میں صف ماتم بچھ گئی ہے۔
انٹرنیشنل میڈیا کے مطابق لوگوں کے ڈوبنے کے واقعات ریاست بہار کے 15 اضلاع میں منگل کے روز سے سامنے آنا شروع ہوئے۔ حکام کے مطابق ڈوبنے کے واقعات دریاؤں اور تالابوں میں اشنان کے دوران ہوئے، جہاں حالیہ سیلاب کے باعث پانی کی سطح بلند تھی۔ میڈیا کے مطابق ڈوبنے کے واقعات اورنگ آباد، گوپال جنگ، سماستی پور، روہتاس، پٹنا اور وشالی سمیت بہار کے 15 اضلاع میں پیش آئے جن کے بعد ڈوبنے والوں میں سے 46 کی لاشیں نکال لی گئی ہیں جبکہ مزید 3 افراد کی تلاش جاری ہے۔ بہار میں جیوت پتریکا کا تہوار مائیں اپنے بچوں کی حفاظت کے لیے مناتی ہیں، یہ تہوار ریاست اترپردیش ور جھارکھنڈ کے علاوہ نیپال میں بھی منایا جاتاہے۔ میڈیا کے مطابق گزشتہ سال بھی اسی تہوار کے دوران 24 گھنٹوں میں 22 افراد ڈوب کر ہلاک ہوگئے تھے۔ حکومت کی جانب سے ہلاک ہونے والوں کے لواحقین کے 4 لاکھ بھارتی روپے کا اعلان کیا گیا ہے۔
