بھارت کا جنگی جنون‘ ایٹمی ہتھیاروں میں مزید5 فیصد اضافہ
بھارت کے جوہری ہتھیاروں کی تعداد پانچ فیصد اضافے سے 164 سے بڑھ کر 172 تک جا پہنچی ہے۔ جب کہ پاکستان کے پاس پہلے سے ہی 170 جوہری وار ہیڈز ہیں
اسٹاک ہوم(انٹرنیشنل ڈیسک) بھارت آج سے نہیں بل کہ پہلے دن سے جنگی جنون میں مبتلا ہے اور اس کیلئے اس نے بہت سی حکمت عملی اپنائی ہیں۔اور اسی وجہ سے آج وہ پاکستان سے زیادہ ایٹمی ہتھیاروں کا مالک بن گیاہے۔سویڈن کے ادارے اسٹاک ہوم انٹرنیشنل پیس ریسرچ انسٹی ٹیوٹ (سیپری) کی جانب سے جاری کردہ ایک سالانہ رپورٹ 2024 کے مطابق بھارت کے جوہری ہتھیاروں کی تعداد پانچ فیصد اضافے سے 164 سے بڑھ کر 172 تک جا پہنچی ہے۔ جب کہ پاکستان کے پاس پہلے سے ہی 170 جوہری وار ہیڈز ہیں۔ چین کے پاس ان دونوں ممالک سے زیادہ 500 ایٹمی وار ہیڈز موجودہیں۔
پاکستان کے پاس موجود جوہری وار ہیڈز کی تعداد بغیر کسی اضافے کے 170 ہے جب کہ بھارت کی توجہ طویل فاصلے تک مار کرنے والے ہتھیاروں کی تعیناتی پر مرکوز ہے۔ ایسے ہتھیار جو چین کو بھی نشانہ بنا سکتے ہیں۔رپورٹ میں مزید کہا گیا ہے کہ امریکا، روس، برطانیہ، فرانس، پاکستان، شمالی کوریا اور اسرائیل اپنے جوہری ہتھیاروں کے ذخیرے کو مسلسل جدید بنا رہے ہیں۔ کچھ ممالک نے پچھلے سال نئے جوہری ہتھیاروں کو تعینات کیا ہے نئے جوہری ہتھیاروں سے لیس نظام نصب کیے۔ 2024 میں 9 ممالک امریکا، روس، برطانیہ، فرانس، چین، انڈیا، پاکستان، اسرائیل اور شمالی کوریا کے پاس مجموعی جوہری ہتھیاروں کی تعداد کم ہو کر تقریباً 12 ہزار 121 ہوگئی ہے۔ پچھلے سال یہ تعداد 12 ہزار 512 تھی۔
رپورٹ کا مزید کہنا ہے کہ شمالی کوریا کے پاس 90 جوہری وار ہیڈز بنانے کے لیے کافی جوہری مواد موجود ہے۔اسرائیل نے کبھی کھلے عام تسلیم نہیں کیا کہ اس کے پاس جوہری ہتھیار ہیں تاہم اندازے کے مطابق اسرائیل اپنے جوہری ری ایکٹر کو اپ گریڈ کر رہا ہے۔
