جاپان میں انوکھا واقعہ، تیز مصالحے والی چپس کھانے سے درجنوں شہری اسپتال پہنچ گئے

جاپان (مانیٹرنگ ڈیسک) جاپان میں انوکھا واقعہ سامنے آیا ہے جس کے مطابق تیز مصالحے والی چپس کھانے سے درجنوں شہری اسپتال پہنچ گئے ہیں ان کی قے کی شکایت سے حالت غیر ہو گئی تھی۔

انٹرنیشنل میڈیا کے مطابق جاپان کے دارالحکومت ٹوکیو میں قائم روکوگو کوکا ہائی اسکول میں لنچ ٹائم کے دوران 30 کے قریب طالب علموں نے تیز مرچ مصالحے والے چپس کھائے۔ انتظامیہ کے مطابق13 طالبات اور ایک طلبہ نے چپس کھانے کے بعد پیٹ اور منہ میں درد کے ساتھ ساتھ قے کی شکایت کی اور ان کی حالت غیر ہونے پر فوری اسپتال منتقل کیا گیا۔

میڈیا رپورٹس کے مطابق چپس بنانے والی کمپنی نے کہا ہے کہ یہ چپس گھوسٹ مرچ نامی انتہائی تیز مرچ سے تیار کیے گئے ہیں جس کی کاشت بھارت میں کی جاتی ہے، اس چپس کو 18 سال سے کم عمر کے افراد کو کھانے سے منع کیا گیا، یہ مرچ کھانے سے پیٹ میں درد اور پیٹ خراب ہونے کی شکایت ہوتی ہے جب کہ ہائی بلڈپریشر اور کمزور معدے والے لوگوں کو بھی یہ چپس کھانے سے منع کیا جاتا ہے۔ انتظامیہ نے بتایا کہ طالب علموں کو طبی امداد دے دی گئی اور کوئی جانی نقصان نہیں ہوا۔