انٹرنیشنل

ممبئی: 6 گھنٹے طوفانی بارشیں،پروازیں منسوخ،درخت اکھڑ گئے،اسکول بند

315 ملی میٹر سے زیادہ بارش ریکارڈ کی گئی جس کے باعث 50 پروازیں منسوخ اور ٹرین سروس معطل ہونے سے ہزاروں افراد ریلوے اسٹیشن پر پھنس گئے

نئی دہلی(ویب ڈیسک)ممبئی: 6 گھنٹے طوفانی بارشیں،پروازیں منسوخ،درخت اکھڑ گئے،اسکول بند، ممبئی میں گزشتہ 6 گھنٹوں میں 315 ملی میٹر سے زیادہ بارش ریکارڈ کی گئی جس کے باعث 50 پروازیں منسوخ اور ٹرین سروس معطل ہونے سے ہزاروں افراد ریلوے اسٹیشن پر پھنس گئے۔ بھارتی میڈیا کے مطابق مسلسل ہونے والی بارش میں ممبئی میں جل تھل ایک ہوگیا۔ مضافاتی علاقوں پالگھر، تھانے اور رائے گڑھ میں 30 لاکھ سے زائد افراد ریلوے، بجلی اور ٹرانسپورٹ کی سہولت سے محروم ہوگئے۔

امدادی کاموں کے دوران نیشنل ڈیزاسٹر ریسپانس فورس (این ڈی آر ایف) کے اہلکاروں نے کشتیوں اور لائف جیکٹس کی مدد سے مہاراشٹر کے علاقے تھانے میں ’’واٹر ریزورٹ‘‘ سے 49 لوگوں اور پالگھر میں 16 دیہاتیوں کو بچایا۔ موسم کی خرابی کے باعث سمندر میں بھی طغیانی کا منظر ہے۔ دوپہر 2 بجے کے قریب لہریں 4.4 میٹر بلند ہوگئیں۔ ممبئی کے ساحلی اور مضافاتی علاقوں میں اورنج الرٹ جاری کردیا گیا۔

ممبئی میں بارش کے باعث 50 سے زائد پروازیں منسوخ کر دی گئیں۔ سڑکیں تالاب کا منظر پیش کر رہی ہیں۔ جگہ جگہ بل بورڈز اور درخت اکھڑے پڑے ہیں۔ محکمہ موسمیات نے مزید دو روز تک وقفے وقفے سے بارش کے جاری رہنے کی پیشن گوئی کی ہے۔ میونسپل اداروں میں ایمرجنسی نافذ کردی گئی اور اسپتالوں میں ریڈ الرٹ جاری کردیا گیا۔

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button