منی پور میں افسوسناک واقعے پر بھارتی سپریم کورٹ کے چیف جسٹس بھڑک اٹھے

دہلی(مانیٹرنگ ڈیسک) چیف جسٹس بھارتی سپریم کورٹ نے منی پور میں خواتین کو برہنہ کرنے کے افسوسناک واقعے پر پولیس اور منی پور انتظامیہ پر برہم کا اظہار کیا ہے۔

انٹرنیشنل میڈیا کے مطابق کیس کی سماعت کے دوران انہوں نے ریمارکس دیے کہ عورتوں کے خلاف جرائم پورے بھارت میں ہو رہے ہیں لیکن منی پور میں جو ہوا اس نے دل دہلا دیا، سر عام عورتیں برہنہ کی گئیں، ان پر تشدد ہوا، ان کا ریپ ہوا، پولیس نے خواتین کی مدد کے بجائے خود عورتیں تشدد کرنے والوں کے حوالے کیں، پولیس نے مقدمہ بھی تب درج کیا جب ویڈیو سامنے آگئی۔

چیف جسٹس بھارتی سپریم کورٹ ڈاکٹر جسٹس دھننجایا نے بھارتی وزیراعظم نریندر مودی کی جانب سے منی پور واقعے پر مسلسل خاموشی کے بعد ازخود ٹو نوٹس لیا تھا۔ تنقید کے بعد بھارتی حکومت کا سیاسی جواب سامنے آیا تھا کہ عورتوں پر مظالم مغربی بنگال، چھتیس گڑھ میں بھی ہوتے ہیں۔ یہی بات سرکاری وکیل نے سپریم کورٹ میں کی تو چیف جسٹس برہم ہوگئے اور کہا کہ تلخ حقیقت ہے کہ پورے بھارت میں عورتوں کیخلاف جرائم ہورہے ہیں لیکن ایک جگہ ہونے والا جرم دوسری جگہ کے جرم کا جواز نہیں بن سکتا، حکومت کا کام ہے کہ جرائم کی روک تھام کرے، منی پور کی مظلوم خواتین کو انصاف ان کی دہلیز پر فراہم کرے۔ کیس کی مزید سماعت کل تک کیلئے ملتوی کردی گئی۔

خیال رہے کہ گزشتہ دنوں پرآشوب بھارتی ریاست منی پور کی ایک ویڈیو سوشل میڈیا پر وائرل ہوئی جس میں کچھ افراد کو دو خواتین کو برہنہ کر کے انہیں سر عام پریڈ کرواتے دیکھا گیا۔ ہجوم کے ہاتھوں زیادتی کا نشانہ بننے والی دو خواتین میں سے ایک خاتون کے شوہر سابق بھارتی فوجی ہیں۔ بھارتی ریاست میں اکثریت میٹی اور اقلیتی کوکی قبائل میں تنازعہ چل رہا ہے اور ریاست میں ہونے والے فسادات میں اب تک 100 سے زائد افراد ہلاک اور سیکڑوں زخمی ہو چکے ہیں، اس کے علاوہ کئی گرجا گھروں، سرکاری دفاتر اور گھروں کو بھی نذر آتش کیا جا چکا ہے۔ بھارت کی ہندو انتہا پسند جماعت بی جے پی کے رہنما این بائرن سنگھ 2017 سے ریاست کے وزیر اعلی ہیں اور ریاست میں 53 فیصد آبادی ہندو میٹی قبیلے کی ہے جبکہ ریاست میں عیسائی مذہب سے تعلق رکھنے والے کوکی اقلیتی قبیلے کی شرح 16 فیصد ہے۔