یوکرین کی جنگ غیر قانونی ‘ روس تنہاء رہ گیا: جوبائیڈن کا دوٹوک پیغام
عالمی تنازعات سے تقریبا ایک ارب لوگ متاثر ہو رہے ہیں، امریکا سب کے لیے محفوظ، خوشحال، مساوی دنیا کا خواہاں ہے: جوبائیڈن
واشنگٹن(مانیٹرنگ ڈیسک) امریکی صدر جو بائیڈن نے دو ٹوک پیغام دیتے ہوئے کہا کہ یوکرین کی جنگ غیر قانونی ہے اور اس معاملے میں روس تنہاء رہ گیا ہے۔
انٹرنیشنل میڈیا کے مطابق ان کاکہنا تھا کہ عالمی تنازعات سے تقریبا ایک ارب لوگ متاثر ہو رہے ہیں، امریکا سب کے لیے محفوظ، خوشحال، مساوی دنیا کا خواہاں ہے۔ انہوں نے کہا کہ موجودہ مسائل کے حل کرنے کے لیے مشترکہ کوششیں درکار ہیں’ میں بطور امریکی صدر اپنی ذمہ داریوں سے بخوبی آگاہ ہوں۔امریکی صدر نے کہا کہ اقوامِ متحدہ عالمی امن کے لیے اپنا کردار جاری رکھے’ ہمیں موسمیاتی تبدیلیوں کے اہداف پر عمل درآمد کیلئے تیزی لانی ہوگی۔ موسمیاتی تبدیلیاں انسانیت کے لیے خطرہ ہیں۔ صدر بائیڈن نے کہا کہ یوکرین کی جنگ غیر قانونی ہے۔ روس یوکرین کے معاملے میں تنہا ہے۔ روس کا خیال ہے دنیا اسے یوکرین میں ظلم کی اجازت دے دیگی۔ روس کو اس معاملے میں چھوڑ دیا جائے تو کیا کسی بھی قوم کی آزادی محفوظ رہ سکے گی؟۔ امریکی صدر نے مزید کہا کہ انسانی حقوق اور خودمختاری اقوام متحدہ کے چارٹر کے بنیادی نکات ہیں، اقوام متحدہ کو یوکرین میں روس کی جارحیت کے خلاف کھڑا ہوناچاہیے۔
