خیبر پختو نخوا پولیس کا بڑا کارنامہ سری لنکا سے آئی ماں کو بیٹی سے ملا وادیا

خیبر(کھوج نیوز) خیبر پختونخوا کے قبائلی ضلع خیبر میں سری لنکا سے آئی ہوئی ایک خاتون کی بیٹی کو عدالتی احکامات کے بعد ان کے حوالے کر کے بخیریت وطن روانہ کر دیا گیا۔پولیس کی جانب سے جاری کیے گئے بیان کے مطابق چندریکا (مسلم نام حنا) نامی سری لنکن خاتون اور ان کی بیٹی کو واپسی کے ٹکٹس بھی خرید کر دیے گئے۔

تفصیلات کے مطا بق سری لنکا سے تعلق رکھنے والی خاتون نے 1994 میں ضلع خیبر کے رہائشی سے کویت میں شادی کی اور ان کے ہاں بیٹی پیدا ہوئی، جس کے چار پانچ سال بعد یہ میاں بیوی اپنی بیٹی سمیت ضلع خیبر میں آکر آباد ہوگئے۔ بعدازاں خاتون سری لنکا چلی گئیں لیکن اپنی بیٹی سے ملنے کبھی کبھی خیبر آتی تھیں، جو اب 25 برس کی ہیں۔ بعدازاں میاں بیوی کے مابین تلخی ہوئی اور خاتون اپنی بیٹی کو سری لنکا لے جانے پر بضد ہو گئیں، تاہم ان کے شوہر یہ نہیں چاہتے تھے اور یوں یہ معاملہ پولیس کے پاس پہنچا۔

انہوں نے بتایا کہ خاتون نے پولیس کو بیٹی کی حوالگی کے لیے درخواست دی اورڈی پی او کی سربراہی میں ایک کمیٹی بنائی گئی۔اس کے بعد عدالت سے رجوع کیا گیا اور عدالت نے خاتون کو ان کی 25 سالہ بیٹی کی حوالگی کے احکامات جاری کیے۔ عدالت میں بیٹی کو بلایا گیا اور ان سے ان کی مرضی پوچھی گئی، جس پر انہوں نے والدہ کے ساتھ سری لنکا جانے پر رضامندی ظاہر کی۔

تفصیلات کے مطابق خاتون کے شوہر کویت میں اپنی ملازمت سے کچھ عرصہ پہلے ریٹائر ہوئے اور اب بھی خیبر میں رہائش پذیر ہیں۔ سری لنکن اہلیہ سے ان کے تعلقات ٹھیک تھے لیکن کچھ عرصہ قبل معمولی تلخی کی وجہ سے ایسا ہوا۔خیبر پختونخوا پولیس کی جانب سے جاری کی گئی ایک ویڈیو میں سری لنکن خاتون نے پولیس کی مہمان نوازی اور مخلصانہ کردار کی تعر یف کی۔