فرخ حبیب کی اہلیہ نے چیف جسٹس کو خط میں کیا لکھا؟ اندرونی کہانی سامنے آگئی
چیف جسٹس کے نام لکھے گئے خط میں استدعا کی گئی ہے کہ فرخ حبیب کی جبری گمشدگی کا فوری لیا جائے اور جلد از جلد بازیابی کو یقینی بنایا جائے

فیصل آباد(نمائندہ کھوج نیوز) پاکستان تحریک انصاف کے رہنما فرخ حبیب کی اہلیہ نے چیف جسٹس قاضی فائز عیسی کے نام خط میں کیا لکھا؟ اس کی اندرونی کہانی سامنے آگئی ہے۔
تفصیلات کے مطابق پاکستان تحریک انصاف کے رہنما فرخ حبیب کی جبری گمشدگی کے معاملے پر ان کی اہلیہ نے اپنے شوہر کی بازیابی کیلئے چیف جسٹس آف پاکستان کے نام خط لکھ دیا، جس میں انہوں نے چیف جسٹس سے فرخ حبیب کی جبری گمشدگی کا فوری نوٹس لینے اور جلد از جلد بازیابی یقینی بنانے کی استدعا کردی۔ پی ٹی آئی رہنما اور سابق وزیر مملکت کی اہلیہ نے اپنے خط میں لکھا ہے کہ فرخ حبیب کی بازیابی کیلئے لاہور ہائی کورٹ میں حبسِ بے جا کی درخواست دائر کی گئی جس پر تاحال کوئی پیش رفت سامنے نہیں آئی، عدالتی حکم کے باوجود حکام فرخ حبیب کے آئینی حقوق کی صریح خلاف ورزی کرتے ہوئے انہیں کسی بھی عدالت میں پیش کرنے میں ناکام رہے ہیں۔
پی ٹی آئی رہنما کی اہلیہ کا کہنا ہے کہ خدشہ ہے میرے شوہر کو اپنی سیاسی وابستگی تبدیل کرنے پر مجبور کرنے کیلئے شدید تشدد اور ٹارچر کا نشانہ بنایا جا رہا ہے، سیاسی رہنماں کے اغوا اور جبری گمشدیوں کے بڑھتے ہوئے واقعات تشویشناک ہیں جن میں اعلی عدلیہ کی مداخلت ناگزیر ہے، محترم چیف جسٹس سے ہمارے خاندان کے بنیادی حقوق کے محافظ کے طور پراس معاملے کا فوری نوٹس لینے اور فرخ حبیب کی بازیابی یقینی بنانے کی استدعا ہے۔