آصف زرداری کی سالگرہ تقریب ”گو مریم گو” کے نعروں سے گونج اٹھی
گزشتہ سولہ ماہ کی حکومت میں پاکستان سب زیادہ مہنگائی میں چلا گیا، ملک دیوالیہ ہونے جا رہا تھا مگر بلاول بھٹو دوسرے ملکوں سے امداد لے کر آئے تو ملک بچ گیا

لاہور(کھوج نیوز) صدر مملکت آصف علی زرداری کی سالگرہ تقریب کے دوران بجلی بند ہونے پر پاکستان پیپلز پارٹی کے کارکنان ”گو مریم گو” اور شرم کرو حیا کرو کے نعرے لگا دیئے گئے۔
تفصیلات کے مطابق لاہور میں آزادی فلائی اوور پر پاکستان پیپلزپارٹی کی مقامی قیادت کی جانب سے صدر مملکت آصف علی زرداری کی سالگرہ کی تقریب جاری تھی کہ اس دوران وہاں کی بجلی منقطع کردی گئی۔بجلی منقطع ہونے پر قیادت اور کارکنان مشتعل ہوئے اور انہوں نے وزیراعلی پنجاب مریم نواز کے خلاف نعرے بازی کرتے ہوئے گو مریم گو، شرم کرو حیا کرو کے نعرے لگائے۔
پیپلزپارٹی کے رہنما فیصل میرنے کہا کہ اگر پیپلزپارٹی نے عدم عتماد کے ذریعے عمران خان کو نہ نکالا ہوتا تو شریف خاندان کے لوگ برطانیہ میں ہوتے، گزشتہ سولہ ماہ کی حکومت میں پاکستان سب زیادہ مہنگائی میں چلا گیا، ملک دیوالیہ ہونے جا رہا تھا مگر بلاول بھٹو دوسرے ملکوں سے امداد لے کر آئے تو ملک بچ گیا۔
فیصل میر نے کہا کہ جب نواز شریف وزیر اعلی پنجاب تھے پیپلزپارٹی کے کارکنوں پر ظلم ہوا، میں کلثوم نواز کے مقابلے میں بھی الیکشن لڑ چکا ہو ں، وہ بڑے ظرف والی خاتون تھی مگر ان کی بیٹی ان پر نہیں گئی۔ انہوں نے کہا کہ اگر آج تم نے لائٹس بند نا کروائی ہوتی تو تمہاری بات نہ ہوتی، یہ جو کچھ ہو رہا ہے مریم کے کہنے پر ہو رہا ہے، اگر پاکستان پیپلز پارٹی ن لیگ کا ساتھ نہ دیتی تو آج یہ جیل میں ہوتے، مریم نواز بشری بی بی کی جگہ جیل میں ہوتی اور شہباز شریف نواز شریف بانی پی ٹی آئی کی جگہ جیل میں ہوتے۔