اضافی کرایہ وصول کرنے والے ٹرانسپورٹرز پر لاکھوں کے جرمانے

لاہور/کراچی(کھوج نیوز) محکمہ ٹرانسپورٹ سندھ اور پنجاب نے اضافی کرایہ وصول کرنے والے ٹرانسپورٹرز پر 12 لاکھ 88 ہزار کا جرمانہ عائد کردیا۔ عیدالاضحیٰ آتے ہی ٹرانسپورٹرز کی طرف اضافی کرائے وصول کیے جانے کے خلاف محکمہ ٹرانسپورٹ سندھ نے کارروائیاں تیز کردیں۔

ترجمان محکمہ ٹرانسپورٹ سندھ کے مطابق کارروائیوں کے دوران 1 ہزار 105 گاڑیوں کی چیکنگ کی گئی، مسافروں کو 12 لاکھ 37 ہزار روپے کا اضافی کرایہ واپس کروایا گیا۔ ترجمان کے مطابق اس دوران اضافہ کرایہ وصول کرنے والے ٹرانسپورٹرز پر 12 لاکھ 88 ہزار کے جرمانے بھی عائد کیے گئے۔ ادھر وزیراعلیٰ مریم نواز نے بھی ٹرانسپورٹ کے من مانے کرائے وصول کرنے کا نوٹس لیا ہوا ہے اور متعلقہ حکام کو کاروائی کرنے کی ہدایات جاری کررکھی ہیں۔

اس حوالے سے صوبائی وزیر شرجیل میمن نے کہا کہ ریلیف اور منصفانہ کرایے کی وصولی کو یقینی بنانا حکومت کی ترجیح ہے۔ انہوں نے مزید کہا کہ مہم کا مقصد مسافروں کو درپیش پریشانیوں اور دشواریوں کاخاتمہ ہے، مسافروں کے ساتھ ناانصافی کرنے والوں کو معاف نہیں کیا جائے گا۔