اپنے ہی گراتے ہیں نشیمن پر بجلیاں، اسد عمر نے عمران خان کو بڑا جھٹکا دیدیا

لاہور(کھوج نیوز) اپنے ہی گراتے ہیں نشیمن پر بجلیاں، پاکستان تحریک انصاف کے سابق رہنماء اور سابق وفاقی وزیر خزانہ اسد نے چیئرمین پی ٹی آئی عمران خان کو بڑا جھٹکا دے دیا ہے۔

تفصیلات کے مطابق سابق رہنما پی ٹی آئی اسد عمر نے کہا کہ ایک دہائی سے زیادہ عوامی زندگی کے بعد میں نے سیاست کو مکمل طور پر چھوڑنے کا فیصلہ کیا ہے۔ انہوں نے کہا کہ جیسا کہ میں پہلے بھی عوامی سطح پر کہہ چکا ہوں کہ میں ریاستی اداروں کے ساتھ تصادم کی پالیسی سے متفق نہیں ہوں اور ایسی پالیسی ریاستی اداروں کے ساتھ شدید ٹکرا ؤکا باعث بنی ہے جو کہ ملک کے مفاد میں نہیں ہے۔

اسد عمر نے اپنے بیان میں کہا کہ میں پی ٹی آئی کی بنیادی رکنیت سے استعفیٰ دے رہا ہوں۔ ان کا کہنا تھا کہ میں ان تمام لوگوں کا شکرگزار ہوں جنہوں نے عوامی زندگی میں میرا ساتھ دیا۔ خاص طور پر میں این اے 54 کی ٹیم اور ووٹرز کا شکریہ ادا کرنا چاہتا ہوں جنہوں نے مجھے دو بار منتخب کیا اور میں نے اس حلقہ کی خدمت کرنے کی بھر پور کوشش کی۔ سابق وفاقی وزیر نے اپنے بیان میں کہا کہ اللہ پاک پاکستانی قوم پر اپنی رحمتیں نازل فرمائے۔