بیرون ملک مقیم پاکستانیوں نے کتنے ارب ڈالر وطن بھیجے؟ اعدادو شمار سامنے آگئے

کراچی (کھوج نیوز)بیرون ملک میں مقیم پاکستانیوں نے کتنے ارب ڈالر وطن بھیجے ؟ اس حوالے سے سٹیٹ بینک کی جانب سے تمام اعدادو شمار سامنے آگئے ہیں جس سے سب حیران رہ گئے ہیں۔

تفصیلات کے مطابق مرکزی بینک کی جانب سے جاری اعداد و شمار کے مطابق بیرون ملک مقیم پاکستانیوں نے دسمبر 2024ء میں 3.07 ارب ڈالرز وطن بھیجے اور دسمبر 2024ء کی ترسیلات دسمبر 2023ء سے 29 فیصد زائد ہیں۔ اعداد و شمار میں بتایا گیا ہے کہ سعودی عرب سے سب سے زیادہ 77 کروڑ ڈالرز اور متحدہ عرب امارات سے 63 کروڑ ڈالرز بھیجے گئے۔ اس کے علاوہ برطانیہ سے 45 کروڑ ڈالرز، یورپ سے 36 کروڑ ڈالرز اور امریکا سے 28 کروڑز ڈالر بھیجے گئے۔ اسٹیٹ بینک کے مطابق رواں مالی سال کی پہلی ششماہی میں پاکستانیوں نے 33 فیصد زائد رقوم بھیجیں، پاکستانیوں نے 6 ماہ میں 17 ارب 84 کروڑ ڈالرز وطن بھیجے، جنوری سے دسمبر 2024 کی ورکرز ترسیلات 34.65 ارب ڈالر رہیں۔