حکومت نے تحریک انصاف کو ایک بار پھر مذاکرات کی پیشکش کیوں کی؟ مصدق ملک اندرونی کہانی سامنے لے آئے
ہم کہتے ہیں آئیں بیٹھیں معاملات الجھائیں مت سلجھائیں' آئیں ہمارے ساتھ مل کر عوام کی خوش حالی کے لیے کام کریں'ملک ایسے ہی چلتا رہا تو برباد ہوجائے گا: مصدق ملک

اسلام آباد(کھوج نیوز) حکومت نے پاکستان تحریک انصاف کو ایک بار پھر مذاکرات کی پیشکش کیوں کی؟ مسلم لیگ ن کے رہنماء اور وفاقی وزیر پٹرولیم مصدق ملک اندرونی کہانی سامنے لے آئے ہیں۔
تفصیلات کے مطابق مسلم لیگ ن کے رہنماء اور وفاقی وزیر پٹرولیم مصدق ملک کا کہنا تھا کہ انتشار کی سیاست کرنے والے ملک کے خیر خواہ نہیں ہیں۔ ملک دشمن عناصر ملکی ترقی کی راہ میں رکاوٹیں کھڑی کر رہے ہیں۔ عوام کو سب معلوم ہے کس نے کیا کیا؟ ٹرینڈ چلا کہ کپتان نہیں تو پاکستان نہیں، ہم کہتے ہیں پاکستان ہے تو ہم سب ہیں۔وفاقی وزیر پیٹرولیم نے کہا کہ حکومت نوجوانوں کو روزگار مہیا کرنے کے لیے دن رات ایک کر رہی ہے۔ مہنگائی کا عام آدمی پر بہت اثر پڑا ہے اس کو ختم کرکے ہی دم لیں گے۔ وزیراعظم شہبازشریف چاہتے ہیں کہ ملک سے مہنگائی ختم ہو۔
وفاقی وزیر پیٹرولیم نے کہا کہ پچھلے دنوں انہوں نے کہا تھا کہ بانی پی ٹی آئی نہیں تو کچھ نہیں۔ سن لو پاکستان ہے تو ہم ہیں۔ کپتان نے کہا کہ نیوٹرل تو جانور ہوتا ہے، چیلو ں نے کہا لبیک، کپتان نے کہا چیف تو باپ ہوتا ہے، پھر کپتان نے کہا باپ تو میر جعفر ہے، چیلوں نے کہا لبیک۔ کپتان نے کہا تھا کہ فوج کو نیوٹرل ہونا چاہیے، چیلوں نے کہا لبیک، پھر کپتان نے کہا کہ نیوٹرل تو جانور ہے، پھر چیلوں نے واہ واہ کی۔
ان کا کہنا تھا کہ وزیراعظم شہباز شریف کے ذہن میں 3 چیزیں ہیں، وہ ملک سے غربت کا خاتمہ چاہتے ہیں، وہ چاہتے ہیں کہ مہنگائی کا فوری خاتمہ ہو اور ملک میں نوجوانوں کے لیے روزگار ہو۔ ہم نے غریبوں کے لیے 6 سو ارب مختص کیے۔ بجلی کا بہت بوجھ ہے وقت کے ساتھ ختم ہوگا۔ مصدق ملک نے کہا کہ حکومت عوام کو ریلیف کی فراہمی کرنے کے لیے کوشاں ہے، روزگارکی فراہمی اولین ترجیح ہے، مہنگائی کے خاتمے سے عوام پر بوجھ کم ہوگا، عوام کو معلوم ہے کس نے کیا کیا؟ مصدق ملک کا کہنا تھا کہ یہ ہمارے بچوں کو جلادو اور ٹھوکریں مار دینے کا کلچر دیتے ہیں۔ کپتان نے کہا فوج کو نیوٹرل ہونا چاہیے۔ کپتان نے کہا کہ امریکا سازش کر رہا ہے کہ فوج ہمیں بچائے، پھر کپتان نے کہا کہ فوج ہمیں برباد کر رہی ہے امریکا ہمیں بچائے۔کیا یہ بہروپیے ہیں؟ ان کا ہم کیا کریں۔ ان کا مقصد صرف ملک کو برباد کرنا ہے۔