خیبرپختونخوا میں شدید بارشیں، سیلاب کے باعث 24افراد جاں بحق، متعدد زخمی
صوبے میں بارشوں اور سیلاب سے 150 گھروں کو نقصان پہنچا' بارش سے بند ہونے والی شاہراہیں کھولنے کیلئے چھوٹی بڑی مشینری استعمال کی جا رہی ہے
پشاور (کھوج نیوز) خیبرپختونخوا میں ہونے والی شدید بارشوں کے باعث آنے والے سیلاب کی وجہ سے 24افراد جاں بحق ہو گئے ہیں جبکہ متعدد افراد زخمی بھی ہوئے ہیں۔
تفصیلات کے مطابق صوبائی ڈیزاسٹر مینجمنٹ اتھارٹی (پی ڈی ایم اے) کی رپورٹ میں بتایا گیا ہے کہ صوبے میں بارشوں اور سیلاب سے 150 گھروں کو نقصان پہنچا۔ پی ڈی ایم اے کے مطابق بالائی اضلاع میں لینڈسلائیڈنگ اور ندی نالوں میں طغیانی، شہروں میں اربن فلڈنگ کا بھی خدشہ ہے۔ پی ڈی ایم اے نے تمام ضلعی انتظامیہ کو موسمی صورتحال کے پیش نظر الرٹ جاری کردیا جس میں ناخوشگوار واقعات سے نمٹنے کیلئے انتظامیہ کو مشینری کی دستیابی کی ہدایت کی گئی ہے۔پی ڈی ایم اے کے مطابق تین روز کے دوران بارشوں اور سیلاب کے باعث 24 افراد جاں بحق اور 17 زخمی ہوگئے جب کہ بارش سے بند ہونے والی شاہراہیں کھولنے کیلئے چھوٹی بڑی مشینری استعمال کی جا رہی ہے۔ پی ڈی ایم اے نے بتایا کہ صوبے میں آج سے مون سون بارشوں کا نیا سلسلہ شروع ہوگا جو 6 اگست تک جاری رہنے کا امکان ہے۔
