سپر ٹیکس کا نفاذ، لاہور ہائیکورٹ نے چونکا دینے والا فیصلہ سنا کر حیران کر دیا

لاہور(کورٹ رپورٹر، مانیٹرنگ ڈیسک) لاہور ہائی کورٹ کا سپر ٹیکس کے نفاذ کے خلاف دائر درخواستوں کے حوالے سے بڑا فیصلہ سامنے آگیا، عدالت نے سپر ٹیکس سال 2022 کے نفاذ کو قانونی قرار دے دیا۔

تفصیلات کے مطابق کے مطابق حکومت کی جانب سے 2022 میں عائد کیے گئے سپر ٹیکس کے نفاذ کے بعد 350 سے زائد درخواست گزاروں نے اس ٹیکس کے خلاف عدالت سے رجوع کیا، لاہور ہائی کورٹ کے جسٹس جواد حسن نے 12 اپریل 2023 کو درخواستوں پر فیصلہ محفوظ کیا اور اسے آج سنادیا۔ جسٹس جواد حسن نے فیصلے میں سپر ٹیکس کا نفاذ درست قرار دے دیا تاہم عدالت نے بینکنگ سمیت 16 سیکٹرز پر سپر ٹیکس کی شرح 10 فیصد سے کم کرکے چار فیصد کردی۔ درخواست گزاروں کے رجوع کرنے پر وفاقی اور ایف بی آر کے وکلا کی جانب سے درخواستوں کی مخالفت کی گئی تھی۔ درخواست گزاروں نے مؤقف اپنایا تھا کہ انکم ٹیکس آرڈی ننس دفعہ 4C کے تحت فنانس ایکٹ 2022 میں سپر ٹیکس کا نفاذ کیا گیا، سپر ٹیکس کا اطلاق سال 2022 پر نہیں ہوسکتا، ٹیکس کا نفاذ گزشتہ مدت پر نہیں ہوسکتا، یہ ٹیکس عائد کرنا غیرقانونی عمل ہے، استدعا ہے کہ سپر ٹیکس کا نفاذ کالعدم قرار دیا جائے۔