شہباز شریف نے اسحاق ڈار کے مخالفین کو سنگین نتائج کی دھمکی لگا دی

اسلام آباد( مانیٹرنگ ڈیسک) شہباز شریف نے اسحاق ڈار کے مخالفین کو سنگین نتائج کی دھمکی لگا دی ، پارٹی میں وزیر خزانہ کی مخالفت کرنے والوں کی کوئی جگہ نہیں سب باہر جائیں گے ۔

تفصیلات کے مطابق وزیراعظم میاں شہباز شریف نے جنرل کونسل سے خطاب کرتے ہوئے کہا کہ میں نے جنرل کونسل کا اجلاس کئی بار مؤخر کرایا کیونکہ میں اس انتظار میں تھا کہ نواز شریف پاکستان آئیں اور میں یہ ذمہ داری ان کے حوالے کروں، الیکشن کمیشن کی تلوار لٹک رہی تھی اس لیے اجلاس بلانا پڑا، یہ پگ جو آج میرے سر پر پہنائی گئی ہے یہ نواز شریف کی امانت ہے اور جب نواز شریف آئیں گے تو پارٹی صدارت ان کے حوالے کردوں گا۔

انہوں نے کہا کہ نواز شریف پاکستان کی ترقی کا معمار ہے، دعا ہے نوازشریف آئیں اور الیکشن لڑیں، چوتھی بار ملک کے وزیراعظم منتخب ہوں۔ شہبازشریف کا کہنا تھاکہ اسحاق ڈار ملکی معیشت کی بہتری کے لیے دن رات محنت کر رہے ہیں، راتوں کو جاگتے ہیں، آئی ایم ایف کی شرائط منظور کرنے کیلئے الٹے سیدھے ہوگئے ہیں، ہماری پارٹی نے اپنا سیاسی سرمایہ جھونک دیا، سیاست نہیں ریاست بچائی۔ انہوں نے کہا کہ بجٹ میں سرکاری ملازمین کی تنخواہوں میں 35 فیصد اضافہ بہت بڑا فیصلہ تھا، جو ہم نے کیا، آئی ایم ایف میں آج بھی ہمارے سینگ پھنسے ہوئے ہیں۔ وزیراعظم کاکہنا تھاکہ جو لوگ اسحاق ڈار کی محنت اور ان کی ٹانگیں کھینچنے کیلئے پارٹی کے اندر جس طرح باتیں کر رہے ہیں، انہیں پارٹی میں رہنے کا کوئی حق نہیں۔