صدرمملکت آصف علی زرداری بھی مریم نواز کےملبوسات کےمداح نکلے،کھل کرتعریف کرڈالی

اسلام آباد(کھوج نیوز) صدر مملکت آصف علی زرداری بھی مریم نواز کے ملبوسات کے مداح نکلے ،کھل کر تعریف کر ڈالی،رپورٹ کے مطابق سعودی عرب کے چورانوے قومی دن کے استقبالئے نے ملک کی متحارب اور مختلف الخیال سیاسی جماعتوں کے قائدین کو پیر کی شام یہاں مقامی ہوٹل میں یکجا کردیا وہ ایک دوسرے سے تپاک کے ساتھ ملے ان میں خوش گپیاں ہوئیں اور قہقہے ابھرتے پھیلتے رہے صدر آصف علی زرداری تقریب کے مہمان خصوصی تھے پنجاب کی وزیراعلی مریم نوازاور پنجاب کی سینئر وزیر مریم اورنگزیب سرکردہ مہمانوں میں شامل تھیں۔

صدر زرداری اپنی تقریر ختم کرکے بطور خاص مہمانوں سے فردا فردا ملتے مریم نواز کے پاس پہنچے اور ان کے لباس اور صحت کی تعریف کی مریم نواز نے سعودی عرب اور پاکستان کے قومی پرچموں کی نسبت سے سبز رنگ کے پرنٹ کی شلوار قمیض اور دوپٹہ پہن رکھا تھا جس میں وہ بہت بھلی لگ رہی تھیں صدر مملکت جنہیں ایک سے زیادہ مرتبہ لاہور جانے کا اتفاق ہوا تاہم مریم نواز وہاں ان سے نہ مل سکیں اور نہ ان کے خیرمقدم کے لئے آسکیں آج ان کی استقبالئے میں ملاقات ہوئی تو صدر آصف زرداری نے ازراہ تفنن مریم نواز سے کہا کہ وہ محنت ضرور کریں اپنی خوراک پر بھی توجہ دیں کہ وہ بہت دبلی ہورہی ہیں۔ اس پر قہقہہ لگا اور صدر آگے بڑھ گئے۔ سعودی سفیر نواف بن سعید احمد المالکی نے مہمانوں کو حفظ مراتب کے لحاظ سے نشستیں دی تھیں مولانا فضل الرحمن نے مریم نواز شریف سے ان کی صحت اور میاں نواز شریف کی خیریت کے بارے میں دریافت کیا۔