عابد باکسر کیخلاف تفتیش میں اہم پیشرفت، نامور افراد کی گرفتاری کا امکان

اسلام آباد(کرائم رپورٹر، مانیٹرنگ ڈیسک) سابق انسپکٹر عابد باکسر پر تھانہ باغبانپورہ میں بھتہ اور اغوا برائے تاوان کا مقدمہ درج ہونے کے بعد کی جانے والی تفتیش میں اہم پیشرفت سامنے آئی ہے۔

تفصیلات کے مطابق سی آئی اے اقبال ٹاؤن لاہور کی تفتیش میں انکشاف ہوا کہ عابد باکسر نے اربوں روپے کے پلازے اور فلیٹ بنا رکھے ہیں۔ عابد باکسر اسلام آباد، لاہور میں ہاسنگ سوسائٹیوں سے بھٹہ مانگتا تھا جس کے ناقابل تردید ثبوت حاصل کر لیے گئے ہیں۔عابد باکسر کے اکاؤنٹ سے کروڑوں روپے کی منی لانڈرنگ کی گئی۔ وہ فاروق ڈار کے ذریعے منی لانڈرنگ کرتا تھا۔فاروق ڈار کی جانب سے بھجوائی گئی ٹرانزیکشنز کا ریکارڈ حاصل کر لیا گیا ہے۔ابتدائی تفتیش کے مطابق عابد باکسر نے بیوی کے نام سے سم نکلوا رکھی تھی۔ اس کے موبائل فون کا تمام ڈیٹا حاصل کر لیا گیا ہے۔اہم انکشافات سامنے آنے کے بعد عابد باکسر کے خلاف تفتیش کا دائرہ کار بڑھا دیا گیا ہے اور مزید گرفتاریاں بھی متوقع ہیں۔گذشتہ روز سابق پولیس انسپکٹر عابد باکسر پر تھانہ باغبانپورہ میں بھتہ خوری اور اغوا برائے تاوان کا ایک اور مقدمہ درج کیا گیا تھا ۔پولیس کے مطابق مقدمہ باغبانپورہ داروغہ والا تھانے میں نجی ہوٹل کے مالک احمد علی نے درج کروایا، مقدمہ 365 اے کی دفعات کے تحت درج کیا گیا۔

ایف آئی آر میں کہا گیا ہے کہ عابد باکسر کے چار سے پانچ ساتھیوں نے ہوٹل آ کر دو کروڑ مانگے، مسلح افراد نے اپنے موبائل فون سے عابد باکسر سے بات کروائی، بات کرنے پر دو کروڑ روپے مانگے اور نہ دینے پر قتل کی دھمکی دی گئی۔ ایف آئی آر میں مزید کہا گیا ہے کہ چار پانچ روز بعد دوبارہ بھتہ مانگا گیا اور نہ دینے پر اغوا کر لیا اور میرے گھر والوں سے 10 لاکھ روپے وصول کئے اور باقی دینے کی شرط پر رہا کیا گیا۔ہوٹل مالک احمد علی کی درخواست پر عابد باکسر سمیت پانچ ملزمان کے خلاف مقدمہ درج کیا گیا ہے۔