علیمہ خان نے خود کو جیل میں بھیجنے کی استدعا کیوں کی؟ بڑی وجہ سامنے آگئی
ہمیں انصاف دیا جائے، روز پیشی پر آتی ہیں، اگر جیل میں بھیجنے سے انصاف ہوتا ہے تو بھیج دیں: علیمہ خان اور عظمیٰ خان کا روسٹرم پر آ کر بیان
لاہور (کورٹ رپورٹر’ مانیٹرنگ ڈیسک)سابق وزیراعظم عمران خان کی بہن علیمہ خان نے خود کو جیل میں بھیجنے کی استدعا کیوں کی؟ اس حوالے سے بڑی وجہ سامنے آگئی ہے۔
تفصیلات کے مطابق لاہور کی انسداد دہشت گردی عدالت میں جناح ہاؤس جلا ؤ گھیرا ؤکیس کی سماعت ہوئی۔تفتیشی افسر نے عدالت کو بتایا کہ ملزمان جناح ہاؤس حملہ کیس میں قصور وار پائے گئے ہیں، جے آئی ٹی نے تینوں ملزمان کو گناہ گار لکھا ہے، پولیس کو تفتیش کے لیے تینوں کی گرفتاری مطلوب ہے، علیمہ خان کی موقع پر موجودگی بھی پائی گئی ہے۔ ملزمان کے وکیل نے عدالت کو بتایا کہ علیمہ خان اور عظمی خان مقدمے میں نامزد نہیں، بیان دکھائے جائیں جن کی روشنی میں ہمیں قصور وار قرار دیا گیا۔ تفتیشی افسر نے کہا کہ ہم ان کو 161 کے تمام بیان دکھا دیتے ہیں۔
دوران سماعت چیرمین پی ٹی آئی کی بہن علیمہ خان روسٹرم پر آگئیں اور کہا کہ ہمیں انصاف دیا جائے، روز پیشی پر آتی ہیں، اگر جیل میں بھیجنے سے انصاف ہوتا ہے تو بھیج دیں۔ چیئرمین پی ٹی آئی کی بہن کو وکیل برہان معظم نے مزید گفتگو کرنے سے روک دیا تاہم علیمہ خان نے کہا کہ ہم کیا مانگ رہے ہیں انصاف ہی تو مانگ رہے ہیں۔ بعدازاں عدالت نے جناح ہاؤس جلا ؤگھیرا ؤکے مقدمے میں وکلاء کو حتمی دلائل کے لیے طلب کرلیا اور ملزمان کی عبوری ضمانتوں میں 16 اکتوبر تک توسیع کردی۔
