عمران خان کے بعد بشریٰ بی بی بھی جیل یاترا پر روانہ ؟

اسلام آباد(کورٹ رپورٹر، مانیٹرنگ ڈیسک) چیئرمین پی ٹی آئی و سابق وزیراعظم عمران خان کے بعد ان کی اہلیہ بشریٰ بی بی کو بھی جیل یاترا پر روانہ کرنے کے لئے تیاریاں مکمل کر لی گئی ہیں۔

تفصیلات کے مطابق احتساب عدالت اسلام آباد کے جج محمد بشیر نے بشری بی بی کے خلاف توشہ خانہ اور 190 ملین پاؤنڈ اسکینڈل کیس کا محفوظ فیصلہ سنا دیا۔ عدالت نے اپنے فیصلے میں کہا کہ نیب کو بشری بی بی کی گرفتاری مطلوب نہیں جب کہ نیب گرفتاری سے قبل ملزم کو آگاہ کرنے کا بھی پابند نہیں ہے۔ احتساب عدالت نے گرفتاری سے پہلے آگاہ کرنے اور بشری بی بی کی درخواستِ ضمانت کو نمٹا دیا۔

اس سے قبل نیب پرایسکیوٹر مظفر عباسی، وکیل صفائی اور پی ٹی آئی وکلا نے محمد بشیر کی عدالت میں پیش ہوکر دلائل دیے۔ وکیل صفائی لطیف کھوسہ نے گرفتاری سے متعلق اعلی عدلیہ کے فیصلے احتساب عدالت میں جمع کروا دیے، لطیف کھوسہ نے کہا کہ جیسے اعلی عدلیہ نے فیصلے کیے، ویسا ہی فیصلہ آپ سے بھی چاہتا ہوں۔ اپنے دلائل میں نیب پراسیکیوٹر نے کہا کہ نیب قانون میں ایسی کوئی شک موجود نہیں۔ مظفرعباسی نے گرفتاری سے متعلق آصف علی زرداری کیس کا حوالہ دیتے ہوئے کہا کہ کہیں نہیں لکھا کہ ملزم کو گرفتاری کے حوالے سے آگاہ کیا جائے۔

مظفر عباسی کا کہنا تھا کہ جس کا حوالہ وکیل لطیف کھوسہ نے دیا، اس کو میرے عدالتی حوالے نے غلط قرار دیا ہے۔ اس پر لطیف کھوسہ نے کہا کہ گرفتاری پر نیب کو چھپن چھپائی نہیں کھیلنی چاہیے، اگر گرفتاری مطلوب نہیں تو بشری بی بی کی ضمانت کنفرم کردیں، وہ تو ہر قانونی حق استعمال کرسکتی ہیں۔ نیب پراسیکیوٹر جنرل نے کہا کہ درخواستِ قبل از گرفتاری پہلے سے خدشے کا اظہار ہے، لہذا آج بھی کہہ رہے کہ بشری بی بی کی گرفتاری مطلوب نہیں ہے۔ احتساب عدالت نے فریقین کے دلائل سننے کے بعد گرفتاری سے قبل بشری بی بی کو آگاہ کرنے اور ان کی گرفتاری کے نقطے پر فیصلہ محفوظ کرلیا تھا۔