لال حویلی ڈی سیل کرنے کی استدعا، شیخ رشید کو بڑا جھٹکا دیدیا

لاہور(کورٹ رپورٹر، مانیٹرنگ ڈیسک) لال حویلی ڈی سیل کرنے کی استدعا پر لاہور ہائیکورٹ نے سابق وزیر داخلہ شیخ رشید کو بڑا جھٹکا دے دیا جس کے بعد ان کی پریشانی میں اضافہ ہوگیا۔

تفصیلات کے مطابق لاہور ہائیکورٹ راولپنڈی بینچ کے جسٹس مرزا وقاص رف نے لال حویلی ملکیتی تنازع کیس پر سماعت کی۔ متروکہ وقف املاک کے ڈپٹی ایڈمنسٹریٹر آصف خان اور ایڈیشنل ایڈووکیٹ جنرل صدیق اعوان عدالت میں پیش ہوئے جبکہ شیخ رشید اور ان کے بھائی شیخ صدیق کی جانب سے ایڈووکیٹ سردارعبد الرازق عدالت کے روبرو پیش ہوئے۔ شیخ رشید اور ان کے بھائی شیخ صدیق کے وکیل نے چیئرمین متروکہ وقف املاک بورڈکے فیصلے پر اعتراض اٹھاتے ہوئے کہا کہ بورڈ میں سیکرٹری اور ڈی جی سمیت تمام عہدے چیئرمین کے پاس ہیں، ہماری دائر کردہ اپیل پر ہمیں نہیں سنا گیا اختیار ایک ہی شخص کے پاس ہے۔ عدالت نے ایڈیشنل ایڈووکیٹ جنرل کو متروکہ وقف املاک کے چیئرمین کے اختیارات سے متعلق تفصیلات کیلئے آدھے گھنٹے کا وقت دیا اور سماعت میں وقفہ کردیا۔ وقفے کے بعد سماعت کے آغاز پر عدالت نے لال حویلی ڈی سیل کرنے کی استدعا خارج کردی تاہم لال حویلی کیس کی پٹیشن باقاعدہ سماعت کے لیے منظورکرلی۔ عدالت نے کہا کہ پٹیشن کے فیصلے تک لال حویلی کی موجودہ پوزیشن برقرار رہے گی، آئندہ 19 اکتوبر کو مفصل سنا جائے گا اور کسی کو التواء نہیں ملے گا۔