پنجاب حکومت کا ”مری ڈیویلپمنٹ پلان” گرینڈ جرگے کا انعقاد، حکومت کو لینے کے دینے پڑ گئے
27 دسمبر کو مری کے تمام چھوٹے بڑے بازاروں میں شٹر ڈاؤن ہڑتال کا اعلان کر دیا گیا' گرینڈ جرگے سے ن لیگ نے مکمل بائیکاٹ کا اعلان کیا تھا
مری (کھوج نیوز) پنجاب حکومت کے ”مری ڈیویلپمنٹ پلان” کے خلاف میری میں گرینڈ جرگے کا انعقاد کیا گیا جس کے بعد وزیراعلیٰ پنجاب سمیت پنجاب حکومت کو لینے کے دینے پڑ گئے ۔
تفصیلات کے مطابق مری کے علاقے لوئر ٹوپہ کے مقام پر گرینڈ عوامی جرگہ منعقد ہوا جس میں سابق وزیر اعظم شاہد خاقان عباسی، سابق ایم این اے صداقت عباسی سمیت مختلف رہنماؤں نے جرگے سے خطاب کیا اور 27 دسمبر کو مری کے تمام چھوٹے بڑے بازاروں میں شٹر ڈاؤن ہڑتال کا اعلان کر دیا گیا۔ جرگہ مری میں جھیکاگلی چوک کی ری ماڈلنگ، مال روڈ پر سیکشن فور اور ایکسپریس وے پر آپریشن کے خلاف منعقد کیا گیا تھا۔ حکومت کی جانب سے دفعہ 144 نافذکی گئی تھی۔ گرینڈ جرگے سے ن لیگ نے مکمل بائیکاٹ کا اعلان کیا۔ جرگے میں تحریک انصاف، پیپلز پارٹی، جماعت اسلامی اور جمعیت علما اسلام نے بھی بھرپور شرکت کی۔ آج مال روڈ اور جھیکا گلی سمیت مختلف چھوٹے بڑے کاروباری مراکز بند رہے۔
