پی ٹی آئی کو اسلام آباد میں جلسے کی اجازت کیوں نہ ملی؟ وجوہات سامنے آگئیں
مقامی افراد کی شکایت اور سکیورٹی اداروں کی رپورٹ پر جلسے کا نوٹیفکیشن معطل کیا گیا: چیف کمشنر اسلام آباد کی طرف سے جاری نوٹیفکیشن کی تفصیل سامنے آگئی

اسلام آباد(کھوج نیوز) پاکستان تحریک انصاف (پی ٹی آئی) کو اسلام آباد میں ترنول کے مقام پر جلسے کی اجازت کیوں نہ ملی؟ اس حوالے سے تمام تر وجوہات سامنے آگئی ہیں۔
تفصیلات کے مطابق چیف کمشنر اسلام آباد کی جانب سے پی ٹی آئی کو جلسے کی اجازت نہ دینے سے متعلق جاری نوٹیفکیشن میں کہا گیا ہے کہ مقامی افراد کی شکایت اور سکیورٹی اداروں کی رپورٹ پر جلسے کا نوٹیفکیشن معطل کیا گیا۔ محمد علی رندھاوا کی جانب سے کہا گیا ہے کہ سکیورٹی الرٹ کے مطابق محرم کے دوران دہشتگرد کارروائیوں کے خطرات ہیں، ترنول کا علاقہ گنجان آباد ہے اور ہوائی اڈے، جی ٹی روڈ، موٹر وے تک رسائی کا اہم مقام ہے۔ اعلامیے میں کہا گیا ہے کہ انٹیلی جنس ایجنسیزکے نمائندگان کے مطابق محرم میں سکیورٹی خطرات کا سامنا ہے، محرم کے باعث جلسہ محفوظ بنانیکیلئے سکیورٹی اداروں کی افرادی قوت دستیاب نہیں، سکیورٹی ایجنسیوں کی جانب سے سکیورٹی الرٹ جاری کیے گئے ہیں۔نوٹیفکیشن کے مطابق پولیس نمائندگان نے تصدیق کی ہے 3 جولائی کو اسلام آباد سے بھاری مقدار میں اسلحہ اور بارود برآمد ہوا، سنگجانی اور ترنول کے علاقوں میں انٹیلی جنس بنیاد پر آپریشن تاحال جاری ہے۔