پی ٹی آئی کی بھوک ہڑتال نہیں بلکہ ڈائٹ پلان ہے: مریم اورنگزیب

لاہور(کھوج نیوز) سینئر صوبائی وزیر پنجاب مریم اورنگزیب نے پی ٹی آئی کی جانب سے لگائے جانے والے بھوک ہڑتالی کیمپ کو ڈائٹ پلان قرار دیتے ہوئے نیا کٹا کھول دیا ہے۔

تفصیلات کے مطابق سینئر صوبائی وزیر کا کہنا تھا کہ 9 مئی کے مجرم کے لئے چار گھنٹے کا ڈائٹ پلان ہی فالو کیا جا سکتا ہے، ملک کو مہنگائی، عوام کو بھوکا کرنے والے کے لئے چار گھنٹے کی ہی بھوک ہڑتال کا مذاق کیا جا سکتا ہے، پچیس کروڑ عوام کو بھوک میں مبتلا کرنے والے 9 مئی کے مجرم کے لئے چار گھنٹے ہی بھوکا رہا جا سکتا ہے۔مریم اورنگزیب کا مزید کہنا تھا کہ قومی تنصیبات ، شہدا کی بے حرمتی ، قائدِ اعظم کے گھر کو جلانے ، پولیس اور رینجرز کے سر پھاڑنے کا اعتراف کرنے والے سزا کے مستحق ہیں، چار گھنٹے بھوک ہڑتال کے نہیں۔ سینئر صوبائی وزیر مریم اورنگزیب کا کہنا ہے کہ دوپہر تین بجے شروع ہونے والی بھوک ہڑتال شام سات بجے تک اختتام پذیر ہونے والا ڈائٹ پلان ہے، 9 مئی کے مجرم کے لئے انٹر مٹنٹ فاسٹنگ ہو رہی ہے، دوپہر کا کھانا کھا کر شام کے کھانے سے پہلے ختم ہونے والی بھوک ہڑتال ڈھونگ اور مذاق ہے۔