ڈی چوک معاملے کے بعد بشریٰ بی بی منظر عام پر آگئی، بڑی سچائی بے نقاب کر دی
شہادتوں کی وجہ سے تکلیف میں تھی، میں بھاگنے والی عورت نہیں ہوں، مجھے ڈی چوک پر اکیلا چھوڑ دیا گیا تھا، سمجھ نہیں آرہا تھا لوگ جھوٹ کیوں بول رہے تھے
چار سدہ (کھوج نیوز) اسلام آباد کے ڈی چوک معاملے کے بعد بانی پی ٹی آئی عمران خان کی اہلیہ بشریٰ بی بی منظر عام پر آگئی ہے جس کے بعد انہوں نے بڑی سچائی بے نقاب کر دی ہے۔
تفصیلات کے مطابق پاکستان تحریک انصاف کے بانی عمران خان کی اہلیہ بشریٰ بی بی اسلام آباد کے ڈی چوک معاملے کے بعد پہلی بار منظر عام پر آگئی ہیں جس کے بعد وہ اسلام آباد دھرنے میں جاں بحق تاج الدین کے گھر گئیں جہاں انہوں نے ورثاء سے تعزیت کی اور انہیں ایک کروڑ کا چیک دیا جب کہ بشری بی بی نے زاہد آباد میں شہید تاج الدین کے نام سے گرلز ہائی اسکول بنانے کا بھی اعلان کیا۔
بشریٰ بی بی کا کہنا تھا کہ عمران خان کے لیے نکلنے والوں کو کبھی اکیلا نہیں چھوڑ سکتی تھی، کسی کو نہیں پتا تھا کہ میری گاڑی کون سی ہے، ڈی چوک پر رات ساڑھے بارہ بجے میں اپنی گاڑی میں اکیلی تھی، وہ ڈی چوک زبردستی خالی کرارہے تھے۔ انہوں نے مزید کہا کہ جب میں وہاں سے نہیں جارہی تھی تو سیدھی میری گاڑی پرفائرنگ ہوئی، باقی قافلہ بعد میں آیا، پٹھانوں نے ہمیشہ غیرت مندی کا ثبوت دیا، بانی پی ٹی آئی نے کہا تھا شہدا کے گھرجانا ہے، ورکرز بانی کے نام پرشہید ہوئے۔ بشری بی بی کا کہنا تھا کہ میں وہاں سے نہیں ہٹی تھی کیونکہ خان نے ہٹنے کا نہیں کہا تھا، میں نے سب کو کہا تھا مجھے اکیلا نہیں چھوڑنا، میں نے صرف آپ کو بتانا ہے کہ میں وہاں اکیلی تھی، مجھے سب نے چھوڑ دیا تھا، بہت سے لوگ گواہ ہیں، جو لوگ روڈ خالی کرا رہے تھے وہ بھی گواہ ہیں۔
