پاکستان

ایون فیلڈ ریفرنس نواز شریف، مریم نواز اور کیپٹن صفدر کی اپیلوں پرکب ہوگی؟

ایون فیلڈ ریفرنس میں سزا کے خلاف خصوصی اپیلوں پر 22 ماہ کے بعد سماعت یکم ستمبر منگل کو ہوگی

ایون فیلڈ ریفرنس میں سابق وزیراعظم نواز شریف ان کی صاحبزادی مریم نواز اور ن لیگ کے تاحیات قائد کے داماد کیپٹن صفدر کی اپیلوں پر سماعت یکم ستمبر کو ہوگی۔

ذرائع کے مطابق ایون فیلڈ ریفرنس میں سزا کے خلاف خصوصی اپیلوں پر 22 ماہ کے بعد سماعت یکم ستمبر منگل کو ہوگی۔ خصوصی اپیلوں کی سماعت اسلام آباد ہائی کورٹ کا دو رکنی بنچ کرے گا، جسٹس عامر فاروق اور جسٹس محسن اختر کیانی خصوصی بنچ کا حصہ ہوں گے۔ ایون فیلڈ ریفرنس میں اپیلوں پر آخری سماعت 19 ستمبر 2018 کو ہوئی تھی، ریفرنس میں سزا معطلی کے بعد سے سابق وزیر اعظم اور مسلم لیگ (ن)کے قائد میاں نواز شریف، ان کی بیٹی مریم نواز اور داماد کیپٹن صفدر ضمانت پر ہیں۔

یاد رہے کہ احتساب عدالت نے 6 جولائی 2018 کو ایون فیلڈ ریفرنس میں تینوں کو قید و جرمانے کی سزا سنائی تھی جس میں نواز شریف کو 10 سال، مریم نواز کو 7 سال اور کیپٹن صفدر کو ایک سال قید کی سزا سنائی گئی تاہم اسلام آباد ہائی کورٹ نے ایون فیلڈ ریفرنس میں 19 ستمبر 2018 کو سزا معطل کردی تھی جب کہ سپریم کورٹ نے 13 جنوری 2019 کو نیب اپیل خارج کرتے سزا معطلی برقرار رکھی تھی۔

Back to top button