پاکستان

سندھ حکومت نے کراچی میں ایک اور ضلع کا اضافہ کردیا

سندھ حکومت نے کیماڑی ٹائون کو ضلع کا درجہ دے دیا ' 20 اگست 2020 کیماڑی کو ضلع بنانے کی منظوری دی گئی تھی

سندھ حکومت نے کراچی میں ایک اور ضلع کا اضافہ کردیا اور کیماڑی ٹاؤن کو ضلع کا درجہ دے دیا ہے جبکہ اس حوالے سے باضابطہ نوٹیفکیشن بھی جاری کر دیا گیا ہے۔

تفصیلات کے مطابق سندھ حکومت کی جانب سے کیماڑی کو ضلع بنانے کا باضابطہ نوٹیفکیشن جاری کردیا گیا ہے جس کے بعد کراچی کے اضلاع کی تعداد 7 ہوگئی ہے۔ خیال رہے کہ 20 اگست 2020 کو سندھ کابینہ نے کراچی کے علاقے کیماڑی کو ضلع بنانے کی منظوری دی تھی۔

ترجمان وزیراعلی سندھ کے مطابق کیماڑی ضلع، سائٹ، بلدیہ، کیماڑی اور ہاربر سب ڈویژنز پر مشتمل ہو گا۔ ترجمان کا کہنا ہے کہ وزیر اعلی سندھ نے ضلع جنوبی کا نام ضلع کراچی رکھنے کی بھی تجویز دی اور نے کہا کہ کراچی کے باقی اضلاع کے نام بھی ان کے مشہور علاقوں سے منسوب کیے جانے چاہئیں۔ ترجمان وزیراعلی سندھ کا کہنا ہے کہ کراچی کا ضلع غربی اس وقت پورے سندھ میں سب سے بڑا ضلع ہے، ضلع غربی کی آبادی 39 لاکھ 14 ہزار 757 ہے۔

Back to top button