پاکستان

بارش اور برفباری سے سردی کی شدت میں اضافہ؛درجہ حرارت تیزی سے کم ہونے لگا

لاہور سمیت پنجاب کے مختلف علاقوں میں بارش اور پہاڑوں پر برفباری سے موسم مزید سرد ہوگیا جب کہ محکمہ موسمیات کے مطابق آئندہ 24گھنٹوں کے دوران لاہور، اسلام آباد سمیت بالائی اور وسطی پنجاب، خیبر پختونخوا، گلگت بلتستان اور کشمیر میں گرج چمک کے ساتھ بارش اور پہاڑوں پر برفباری کا امکان ہے۔

گذشتہ 24 گھنٹوں کے دوران خیبر پختونخوا،مری، شمال مغربی بلوچستان، خطہ پوٹھوہار، کشمیر اور گلگت بلتستان میں بارش ہوئی جبکہ کالام میں برفباری بھی ریکارڈ کی گئی۔ سب سے زیادہ بارش خیبر پختونخوا، دیربالا 22، کم سے کم درجہ حرارت کالام منفی 2 ڈگری سینٹی گریڈ ریکارڈ کیا گیا۔

ایوبیہ گلیات میں بھی طویل خشک سالی کے بعد بارش اور ہلکی برف باری کے بعد سردی میں اضافہ ہو گیا ہے،ملکہ کوہسار مری میں یخ بستہ ہواوں کے ساتھ وقفے وقفے کے ہلکی بارش کاسلسلہ جاری ھے، بارش کی وجہ سے لوگوں میں خوشی کی لہر دوڑ گئی۔

بلوچستان میں چمن، پشین ،زیارت،مسلم باغ، شیلا باغ، جنگل پیرعلیزئی، گلستان، توبہ اچکزئی اور ملحقہ علاقوں میں بارش ہوئی۔ لوئر دیر میں رات گئے بارش اور موسم سرما کی پہلی برفباری ہوئی۔

Back to top button