اداکارہ ماہرہ خان نے دوسری شادی کس کے ساتھ کی؟ نام سامنے آگئے

لاہور(کلچرل رپورٹر، مانیٹرنگ ڈیسک) پاکستانی اداکارہ ماہرہ خان نے دوسری شادی کس کے ساتھ کی؟ اس شخص کا نام اور اس کا کاروبار بھی سامنے آگیا ہے۔

تفصیلات کے مطابق پاکستانی سپر اسٹار اداکارہ ماہرہ خان اپنے پرانے دوست اور کاروباری شخصیت سلیم کریم کے ساتھ شادی کے بندھن میں بندھ گئیں۔اداکارہ کی شادی کی تقریب میں محدود تعداد میں قریبی دوست اور رشتہ دار شریک ہوئے۔ اداکارہ ماہرہ خان کی منیجر انوشے طلحہ خان کی جانب سے سوشل میڈیا پر جاری کی گئی تصاویر اور ویڈیوز میں دیکھا جا سکتا ہے کہ دلہن کے سفید جوڑے میں ملبوس اداکارہ اپنے شوہر کی جانب بڑھ رہی ہیں۔ ماہرہ خان کی شادی کی تصاویر اور ویڈیوز بھی سوشل میڈیا پر گردش کر رہی ہیں۔صارفین کی جانب سے جوڑے کو مبارکبادیں بھی دی جا رہی ہیں۔

اداکارہ ماہرہ خان بول، منٹو، ایکٹر ان لا، رئیس، ورنہ، سات دن محبت اِن جیسی فلموں میں کام کرچکی ہیں جبکہ حال ہی میں فلم دی لیجنڈ آف مولا جٹ میں ان کی جاندار اداکاری کو نہ صرف شائقین اور فینز بلکہ فلم ناقدین کی جانب سے بھی سراہا گیا تھا۔ اس سے قبل 2007 میں اداکارہ ماہرہ خان کی علی عسکری سے پہلی شادی ہوئی تھی تاہم 2015 میں جوڑے نے علیحدگی اختیار کرلی تھی ، پہلی شادی سے ماہرہ خان کا ایک 13 سالہ بیٹا ہے۔ماہرہ خان کی منگنی کی خبریں بھی کئی سال پہلے گردش کی تھیں تاہم اداکارہ کی جانب سے کبھی بھی منگنی کی تصدیق نہیں کی گئی تھی، حال ہی میں معروف پاکستانی اداکار، ہدایتکار و پروڈیوسر ہمایوں سعید نے کہا ہے کہ اداکارہ ماہرہ خان کی شادی کی وجہ سے فلم کی شوٹنگ کا شیڈول تبدیل کردوں گا۔