برقعہ پہن کر بازارجاتی ہوں تو بھی لوگ،،،ماہرہ خان کے دلچسپ انکشافات

کراچی(شوبز ڈیسک) پاکستان شوبز انڈسٹری کی معروف اداکارہ ماہرہ خان نے انکشاف کیا ہے کہ وہ برقعہ پہن کر بازار جاتی ہیں تو بھی لوگ اُنہیں پہچان لیتے ہیں۔ ماہرہ خان نےحال ہی میں آرٹس کونسل کراچی میں ہونے والی 17ویں عالمی اردو کانفرنس میں کراچی اور لاہور کے بازاروں میں شاپنگ کرنے کے دلچسپ تجربے کے بارے میں بات کی۔ اُنہوں نے بتایا کہ میں آج صبح اپنی منیجر سے کہہ رہی تھی کہ تم لوگ مجھے لائٹ ہاؤس وغیرہ لے کر نہیں جاتے، میں نے سنا ہے ان بازاروں سے بہت اچھی چیزیں ملتی ہیں، تم لوگ مجھے وہاں برقع پہنا کر لے چلو۔

اداکارہ نے مزید بتایا کہ اب مسئلہ یہ ہے کہ ایک دو بار میں لاہور اور کراچی کے بازاروں میں برقع پہن کر گئی بھی ہوں لیکن لوگ میری آواز سے مجھے برقع پہنے ہوئے بھی پہچان لیتے ہیں اور میں خاموش رہوں ایسا ہو نہیں سکتا پھر مزہ ہی نہیں آئے گا۔ اُنہوں نے کہا کہ میں بازار جاتے ہوئے سر سے پیر تک مکمل ڈھکی ہوئی ہوتی ہوں لیکن جیسے ہی میں بولنا شروع کرتی ہوں لوگ مجھے پہچان لیتے ہیں اور پوچھتے ہیں کہ آپ ماہرہ خان ہیں نا؟ تو میرا اس طرح بازار جانے کا پلان فیل ہوجاتا ہے۔