کراچی(کھوج نیوز) سندھ میں 4 برس کے دوران کاروکاری قرار دے کر کتنے افراد کو قتل کیا گیا؟ اس حوالے سے سندھ پولیس کے ریکارڈ سے افسوسناک رپورٹ منظر عام پر آگئی ہے۔
تفصیلات کے مطابق سندھ کے مختلف علاقوں میں گزشتہ 4 برسوں کے دوران 595 افراد کو کاروکاری قرار دے کر قتل کردیا گیا جن میں 466 خواتین اور 129 مرد شامل ہیں۔ سندھ پولیس کے ریکاڈ کے مطابق سال2022 میں 102 واقعات میں 114 افراد کو کاروکاری قرار دے کر قتل کیا گیا جن میں 89 خواتین اور 25 مرد شامل تھے۔ سال 2023ء میں کاروکاری کے 151 واقعات میں 167 افراد قتل کیے گئے جن میں 135خواتین اور 32 مرد شامل تھے۔ سال 2024ء میں کاروکاری کے 132 واقعات میں 152 افراد کو قتل کیا گیا جن میں123 خواتین اور 29 مرد شامل ہیں۔
ریکارڈ کے مطابق کاروکاری قرار دے کر قتل کرنے والے ملزمان میں 294 ملزمان مقتولین کے شوہر، والد ، والدہ، بھائی، بیٹے ، بیٹی اور بہنیں ہیں، 204 دیگر رشتہ دار جب کہ 16 پڑوسی ، دوست اور دیگر ملزمان شامل ہیں۔ پولیس کے مطابق 4 برس کے دوران کاروکاری کے واقعات میں ملوث ملزمان میں 171 مقتولین کے شوہر، 33 مقتولین کے باپ، 77 مقتولین کے بھائی، 5 مقتولین کے بیٹے، 2 مقتولین کی بہنیں ، 2 مقتولین کی والدہ اور 4 مقتولین کی بیٹیاں شامل ہیں۔ سال 2025ء کے 10 ماہ کے دوران (ماہ اکتوبر تک) صوبے میں کاروکاری کے 140 کیسز رپورٹ ہوئے جن میں 162 افراد کو قتل کیا گیا، مقتولین میں 119 خواتین اور 43 مرد شامل ہیں۔
