کھیل

ایشیاء کپ، افغانستان نے بنگلہ دیش کو شکست دیکر سپر فور مرحلے کیلئے کوالیفائی کر لیا

افغانستان نے نجیب اللہ زادران کی دھواں دار بیٹنگ کی بدولت بنگلادیش کا 128 رنز کاہدف 19 ویں اوور میں 3 وکٹوں کے نقصان پر پورا کرلیا

ایشیا کپ ٹی ٹوئنٹی ٹورنامنٹ کے گروپ بی کے میچ میں افغانستان نے بنگلادیش کو 7 وکٹوں سے شکست دے کر سپر فور مرحلے کے لیے کوالیفائی کرلیا۔

تفصیلات کے مطابق افغانستان نے بنگلادیش کا 128 رنز کاہدف 19 ویں اوور میں 3 وکٹوں کے نقصان پر پورا کرلیا،نجیب اللہ زادران نے 6 چھکوں کی مدد سے17 گیندوں پر 43 رنز کی ناقابل شکست اننگز کھیلی۔ شارجہ کرکٹ اسٹیڈیم میں کھیلے گئے میچ میں بنگلادیش کے کپتان شکیب الحسن نے ٹاس جیت کر پہلے بیٹنگ کا فیصلہ کیا۔ بنگلادیش نے مقررہ 20 اوورز میں 7 وکٹوں کے نقصان پر 127 رنز بنائے، مصدق حسین نے ناقابل شکست 48 رنز اسکور کیے۔

بنگلادیش کی ٹیم شروعات سے ہی مشکلات سے دوچار رہی، افغان اسپنرز نے بنگلادیشی بیٹرز کو جم کر نہ کھیلنے دیا، 53 کے مجموعی اسکور پر 5 کھلاڑی پویلین لوٹ گئے۔ تاہم بنگلادیشی بیٹر مصدق حسین نے ذمہ داری سے بیٹنگ کی اور ٹیم کا اسکور 127 رنز تک پہنچایا، وہ 31 گیندوں پر 48 رنز بناکر نمایاں رہے۔اس کے علاوہ محموداللہ نے 25 اورمہدی حسن نے 14 رنز بنائے۔ افغانستان کی جانب سے راشد خان اور مجیب الرحمان نے 3،3 وکٹیں حاصل کیں۔

128 رنز کے ہدف کے تعاقب میں افغانستان ٹیم کا شروعات اتنی اچھی نہ تھی، اوپنر رحمان اللہ 11 رنز بناکر آؤٹ ہوگئے۔ افغانستان کو دوسرا نقصان 45 رنز کے مجموعی اسکور پر اٹھانا پڑا جب حضرت اللہ ززئی 23 رنز بناکر پویلین لوٹے۔اس کے علاوہ کپتان محمد نبی 8 رنز بناسکے۔ 3 وکٹیں گرنے کے بعد نجیب اللہ زادران اور ابراہیم زادران نے ذمہ داری سے بیٹنگ کی اور افغانستان کو مسلسل دوسری کامیابی دلواتے ہوئے سپر فور مرحلے میں پہنچا دیا۔ ابراہیم نے 41 گیندوں پر 42 رنز کی اننگز کھیلی جبکہ نجیب نے17 گیندوں پر 6 چھکوں کی مدد سے 43 رنز بنائے۔ بنگلادیش کی جانب سے شکیب الحسن، مصدق اورسیف الدین نے ایک، ایک وکٹ حاصل کی۔ افغانستان ایشیا کپ 2022 میں اگلے مرحلے میں پہنچنے والی پہلی ٹیم ہے۔

متعلقہ خبریں

Back to top button

Adblock Detected

We Noticed You are using Ad blocker :( Please Support us By Disabling Ad blocker for this Domain. We don't show any popups or poor Ads.