انعامات کی بارش‘بھارتی ٹیم کوبی سی سی اور آئی سی سی سے کتنے ملین ڈالر ہاتھ آئے؟

لاہور(سپورٹس ڈیسک)بھارتی کرکٹ بورڈ (بی سی سی آئی) نے ٹی20 ورلڈکپ جیتنے والی ٹیم کو 15 ملین ڈالر (یعنی پاکستان روپوں میں 4 ارب سے زائد) کی رقم دینے کا اعلان کردیاہے۔اتنی بڑی رقم کے اعلان پر بھارتی کرکٹرز پھولے نہیں سما رہے اور ان کی بیگمات نے ان کی واپسی پر جشن فتح رکھے ہیں جن میں ویرات کوہلی کی اہلیہ اداکارہ انوشکا شرما بھی پیش پیش ہیں۔میڈیا رپورٹس کے مطابق بی سی سی آئی سیکریٹری جے شاہ نے ٹی20 ورلڈکپ جیتنے والی ٹیم، سپورٹ اسٹاف اور کوچز کیلئے بھاری انعامی رقم کا اعلان کیاہے۔جے شاہ نے روہت شرما کی قیادت میں 11 سال بعد آئی سی سی ٹائٹل جیتنے پر کہا کہ“میں ٹیم انڈیا کیلئے 125 کروڑ بھارتی روپے (14.9 ملین ڈالر) کی انعامی رقم کا اعلان کررہا ہوں جس کی بیحد خوشی ہے”۔ٹیم میں یکساں طور پر ہر کھلاڑی کے6 لاکھ ڈالر (یعنی پاکستانی روپوں میں 16 کروڑ 65 لاکھ سے زائد)کی رقم ہاتھ آئے گی۔

دوسری جانب ٹی20 ورلڈکپ جیتنے والی بھارتی ٹیم کو آئی سی سی کی جانب سے نقد 24 لاکھ ڈالر (یعنی پاکستانی روپوں میں 68 کروڑ سے زائد) کی رقم ملے گی۔ یہ سال 2022 میں ہونے والے آخری میگا ایونٹ سے کئی گنا زیادہ ہے جس میں فاتح انگلینڈ کو 10 لاکھ ساٹھ ہزار ڈالر کی انعامی رقم دی گئی تھی۔واضح رہے کہ بھارتی ٹیم نے گزشتہ ہفتے بارباڈوس میں جنوبی افریقہ کو سنسنی خیز فائنل میں 7 رنز سے شکست دیکر دوسری بار ٹی20 ٹائٹل اپنے نام کیا تھا جبکہ سال 2013 کے بعد یہ پہلی ٹرافی تھی۔