سری لنکا کے خلاف کلین سوئپ،بابر اعظم نے خود کو بہت خوش قسمت قرار دیدیا

کولمبو(سپورٹس ڈیسک، آن لائن ) قومی ٹیم کے کپتان بابر اعظم نے سری لنکا کے خلاف دو ٹیسٹ میچوں کی سیریز میں کلین سوئپ پر خود کو بہت خوش قسمت قرار دیدیا اور کہا کہ ہم نے اپنی گیم کے انداز کو اٹھانے کا پلان بنایا تھا اور اس کے مطابق کھیلے، ہمارا کھیلنے کا اپنا انداز ہے اور اسی کے مطابق کھیلتے ہیں۔

تفصیلات کے مطابق سری لنکا کیخلاف ٹیسٹ سیریز جیتنے کے بعد پاکستان کرکٹ ٹیم کے کپتان بابراعظم نے ڈریسنگ روم میں ساتھی کرکٹرز سے خطاب کیا اور ان کی کارکردگی کو سراہا۔کپتان بابراعظم نے ڈریسنگ روم میں ساتھی کرکٹرز سے خطاب کرتے ہوئے کہا کہ سری لنکا میں ٹیسٹ سیریز جیتنا بہت مشکل ہوتا ہے، کسی ایک کی وجہ سے نہیں، پوری ٹیم کی کوشش سے کامیابی ملی ہے۔ ٹیسٹ سیریز میں پاکستان ٹیم کی کارکردگی اطمینان بخش رہی ہے، جیت کا کریڈٹ پوری ٹیم اور مینجمنٹ کو جاتا ہے۔بابراعظم نے کہا کہ سیفی بھائی، آپ کھیلنا چاہتے تھے مگر آپ کی صحت ہمارے لئے اہم تھی، سرفراز آپ کی یہی بات اچھی ہے کہ آپ ہمت نہیں ہارتے ہیں۔

بابراعظم نے مزید کھلاڑیوں کو سراہتے ہوئے کہا کہ نومی بھائی، ویل بولڈ! جیسی آپ نے بولنگ کی، ایسا ہی ہمیں چاہیے تھا، شاہین اور نسیم نے بھی زبردست بولنگ کی، نئے بال سے زیادہ جو پرانے گیند سے بولنگ کی وہ زبردست رہی۔کپتان نے یہ بھی کہا کہ یہ سب کچھ ہم نے کیا، آئندہ بھی ہم ہی کریں گے، ہمیں کسی ایک پر انحصار نہیں کرنا، سب کو مل کر کر کے دکھانا ہے، یہ نہیں سوچنا کہ دوسرا کر دے گا، خود سے کہنا ہے کہ ہم کریں گے، ہم نے جیسی کرکٹ کھیلی ہے، ہم پوری سیریز میں چھائے رہے اور جو ہم نے سری لنکا میں کیا ہے، ہم نے ایسا ہی کرتے رہنا ہے۔بابراعظم نے اپنے خطاب میں کہا کہ سری لنکا میں اس سے پہلے ان کے سپنرز کو کسی نے ایسے نہیں کھیلا، سعود اور عبداللہ نے بھی بہترین کارکردگی کا مظاہرہ کیا، ہر وقت ایک جیسا نہیں ہوتا، کبھی جو سوچتے ہیں، ویسا نہیں ہو پاتا، شان مسعود نے اپنی محنت اور اپنا اعتماد نہیں چھوڑا، برے وقت سے نکلنا ہر پلیئر کو آتا ہے، سمارٹ کرکٹر وہی ہے جو اس سے جلد نکلتا ہے۔ بابر اعظم نے کہا کہ سب نے گزشتہ ساڑھے 3 ماہ میں بہت محنت کی ہے، کوچز نے کھلاڑیوں کے ساتھ کام کیا اور کھلاڑیوں نے بھی انفرادی طور محنت کی، سری لنکا آنے سے قبل کھلاڑیوں نے یہاں کی کنڈیشنز کے مطابق محنت کی، ہم سیریز کے لیے تیار ہو کر آئے تھے۔

بابر اعظم نے کہا کہ میں کھلاڑیوں کی کارکردگی سے مطمئن ہوں، پہلی اننگز میں ابرار احمد نے اچھی بولنگ کی جبکہ عبدااللہ شفیق کی غیر معمولی بیٹنگ رہی، محنت کبھی رائیگاں نہیں جاتی، عبداللہ شفیق نے بہت محنت کی جبکہ سمان علی آغا بالکل مختلف انداز میں کھیلے۔بابر اعظم نے کہا کہ ہم نے آنے سے پہلے سے پلان کیا تھا کہ اب تمام سیریز مثبت انداز میں کھیلنی ہیں، ہم نے اپنی گیم کے انداز کو اٹھانے کا پلان بنایا تھا اور اس کے مطابق کھیلے، دوسری ٹیم پر غلبہ حاصل کرنے اور مخالف ٹیم کو سیٹل نہ ہونے دینے کا بھی پلان بنایا تھا، یہ اسی طرح ممکن تھا کہ ہم دباؤ ڈالیں اور ایسا ہی کیا، کھلاڑیوں نے پلان کے مطابق کام کیا، ہم نے اپنے طریقے سے کھیلنا ہے، ہمارا کھیلنے کا اپنا انداز ہے اور ہم اسی کے مطابق کھیلتے ہیں، اس میں ہم کامیاب ہوئے ہیں۔بابر اعظم نے سری لنکا کے خلاف فیلڈنگ کو بہتر قرار دیتے ہوئے کہا کہ ہماری فیلڈنگ بہت اچھی رہی، اس کے لیے ہم نے بہت کام کیا ہے، ہر چیز بہتر کرنے میں وقت لگتا ہے، اب چیزیں بہتر ہو رہی ہیں۔قومی ٹیم کے کپتان کا کہنا تھا میں بہت لکی ہوں کیونکہ جو لڑکا ہمارے پاس آتا ہے وہ صورتحال کو سمجھ کر کھیلتا ہے۔