سینٹرل کنٹریکٹ؛قومی کرکٹرزکوکیا کچھ ملےگا؟

لاہور(سپورٹس ڈیسک) قومی کرکٹرز کو آئندہ ہفتے سینٹرل کنٹریکٹ دیے جانے کا امکان ہے۔ اس سے قبل 30 جون کو ختم ہونے والے کنٹریکٹس میں 1 ماہ کی توسیع دی گئی تھی۔ قومی کرکٹرز کے سینٹرل کنٹریکٹس کے لیے پی سی بی کے متعلقہ ڈیپارٹمنس کے کام کو حتمی شکل دیے جانے کے لیے کام جاری ہے۔ کرکٹ کمیٹی کے چیئرمین مصباح الحق کو آئندہ ہفتے کے دوران سینٹرل کنٹریکٹ پر بریفنگ دی جائے گی اور پھر وہ چیئرمین منیجمنٹ کمیٹی ذکاء اشرف کو اس حوالے سے آگاہ کریں گے۔

چیئرمین ذکاء اشرف کی منظوری کے بعد سینٹرل کنٹریکٹ پیش کیے جانے کا امکان ہے۔ ذرائع کا کہنا ہے کہ سینٹرل کنٹریکٹ میں اب توسیع کا امکان نہیں ہے، ایک ماہ توسیع کی مدت کل 31 جولائی کو ختم ہو رہی ہے۔ سی ای او سلمان نصیر اور ڈائریکٹر انٹرنیشنل عثمان واہلہ نے سری لنکا میں کپتان بابر اعظم اور سینئر کھلاڑیوں سے سینٹرل کنٹریکٹ کے معاملے پر بات کی تھی۔

کھلاڑیوں کے سینٹرل کنٹریکٹ اور میچ فیس میں 25 سے 35 فیصد اضافے کا امکان ہے جبکہ لیگز کے لیے این او سی کی ازسرِ نو پالیسی کی شقیں کنٹریکٹ میں شامل کی جائیں گی۔