قومی ٹیم میں سرجری جاری، آپریشن کیلئے شاہین آفریدی اہم
رپورٹ میں کئی کھلاڑیوں کا رویہ غیر سنجیدہ قرار دیا گیا
لاہور(سپورٹس ڈیسک)قومی کرکٹ ٹیم کی سلیکشن کمیٹی کے ممبرز وہاب ریاض، عبدالرزاق اور منیجر منصور رانا کو عہدوں سے ہٹانے کی اندرونی کہانی سامنے آ گئی۔ذرائع کے مطابق قومی کرکٹ ٹیم کے کوچز نے چیئرمین پی سی بی محسن رضا نقوی کو ٹی20 ورلڈکپ 2024 میں کھلاڑیوں کی ناقص کارکردگی کی رپورٹ پیش کی جس میں کوچز نے چند کھلاڑیوں کا رویہ غیرسنجیدہ قرار دیا۔چیئرمین پی سی بی محسن نقوی نے کوچز کے ساتھ 2 سیشن مکمل کر لیے، ذرائع کا کہنا ہے کہ کوچز کی رپورٹ میں کئی کھلاڑیوں کو غیر سنجیدہ قرار دیا گیا، کوچز نے چیئرمین پی سی بی کو تمام صورتحال سے آگاہ کر دیا۔ذرائع کے مطابق پاکستان کرکٹ ٹیم کے فاسٹ بولر شاہین آفریدی حالیہ ٹورز کے دوران کوچز اور منجمنٹ اسٹاف کے ساتھ برے برتائو سے پیش آئے۔
مینجرز نے شاہین آفریدی کے خلاف کوئی ایکشن نہیں لیا حالانکہ ٹورز کے دوران ڈسپلن برقرار رکھنا مینجرز کی ذمہ داری تھی۔چیئرمین پی سی بی محسن نقوی نے تحقیقات مکمل ہونے کے بعد وہاب ریاض اور عبد الرزاق کو ہٹانے کا فیصلہ کیا۔ذرائع کا بتانا ہے کہ جن کھلاڑیوں کی وہاب ریاض اور عبدالرزاق نے حمایت کی انہوں نے ہی پرفارم نہیں کیا، جن کرکٹرز کی ان دونوں نے حمایت کی دیگر سلیکٹرز نے ان کی مخالفت کی۔
ذرائع نے دعوی ٰکیا ہے کہ ورلڈ کپ کے دوران شاہین آفریدی کا رویہ مبینہ طور پر درست نہ تھا اور ٹیم مینجر وہاب ریاض نے شاہین آفریدی کی ڈسپلن کی خلاف ورزی کو نظرانداز کیا لہذا اس چیز کا جائزہ لیا جا رہا ہے کہ شاہین آفریدی کے خلاف ایکشن کیوں نہیں لیا گیا۔ذرائع نے بتایا کہ کھلاڑیوں کی مبینہ لابیز کے بارے میں بھی تحقیقات ہورہی ہیں اور جن جن کھلاڑیوں کی لابیز ہیں ان کی بھی تحقیقات کی جا رہی ہے اور اس بات پر بات چیت ہو رہی ہے کہ ان لابیز سے کیا کیا فائدہ اٹھایا جا رہا ہے۔
ذرائع کا یہ بھی بتانا ہے کہ کھلاڑی ایک دوسرے کے خلاف باتیں کرتے ہیں جس سے ماحول خراب ہوتا ہے، علاوہ ازیں محسن نقوی سے فیملیز کو ساتھ لے جانے اور پھر کھیل پر فوکس ہونے پر بھی تفصیلی بات ہوئی۔واضح رہے کہ ایک روز قبل چیئرمین پی سی بی محسن رضا نقوی نے ٹی20 ورلڈکپ 2024 میں ناقص کارکردگی پر سرجری کا آغاز کرتے ہوئے وہاب ریاض اور عبد الرزاق کو سلیکشن کمیٹی جبکہ منصور رانا کو ٹیم منیجر کے عہدوں سے ہٹا دیا تھا۔
