مریم نواز نے ارشد ندیم کے گھر جا کر 10کروڑ کا چیک ‘ گاڑی کی چابی پیش کی

|لاہور(سپورٹس ڈیسک)وزیر اعلیٰ پنجاب مریم نواز شریف میاں چنوں کے نواحی گائوں میں اولمپیئن ارشد ندیم کے گھر پہنچ گئیں جہاں انہوں نے ارشد ندیم کو دس کروڑ کا چیک اور گاڑی کی چابی عنایت کی ۔گاڑی کا نمبر بھی 92.97دیا گیا۔گائوں101 پندرہ ایل میں وزیر اعلیٰ مریم نواز شریف کی آمد پر اولمپیئن ارشد ندیم اور اہل خانہ نے پر خلوص استقبال کیا۔وزیر اعلیٰ مریم نواز شریف نے ارشد ندیم کی والدہ رضیہ پروین کو گلے لگا لیا اور مبارکباد
پیش کی ۔

وزیر اعلیٰ مریم نواز شریف نے ارشد ندیم کی والدہ کو اپنے ساتھ بٹھایا اور کافی دیر باتیں کرتی رہیں۔وزیر اعلیٰ مریم نواز شریف نے گھر کے اندر خود جاکر ارشد ندیم کے اہل خانہ سے ملاقات کی اور مبارکباد دی۔وزیر اعلیٰ مریم نے اہل خانہ کے ساتھ تصاویر اور سیلفیاں بھی بنوائیں ۔ اولمپئین ارشد ندیم نے اولمپکس مقابلوں کی یاد تازہ کی اور اپنی کاوش سے آگاہ کیا۔وزیر اعلیٰ پنجاب مریم نواز شریف نے اولمپیئن ارشد ندیم کو 10- کروڑ روپے کا چیک پیش کیاوزیر اعلی مریم نواز شریف نے ارشد ندیم کو ہنڈا سوک کا ر'” پی اے کے 92.97″کی چابی پیش کی۔وزیر اعلی ٰمریم نواز نے کوچ سلمان اقبال بٹ کو بھی پچاس لاکھ روپے کا چیک دیا۔

مریم نواز نے ارشد ندیم کے کوچ اور استاد کو بھی شاباش دی۔ارشد ندیم نے قوم کو بے مثال خوشی سے ہمکنار کیا۔ اولمپین ارشد ندیم اور انکے والدین نے وزیر اعلیٰ کی آمد کو عزت افزائی قرار دیا۔سینیئر منسٹر مریم اورنگزیب ، وزیر کھیل فیصل ایوب کھوکھر’ معاون خصوصی ذیشان ملک ایم پی اے ثانیہ عاشق، عامر حیات ہراج، پیر اسلم بودلہ ،چیف سیکرٹری ، اے سی ایس ساوتھ , اے آئی جی ساوتھ،سیکرٹری سپورٹس،کمشنر ، آر پی او ، ڈپٹی کمشنر ، اور دیگر بھی موجودتھے۔