پی سی بی چیئرمین سمیت اعلی عہدیدار کرکٹ کی بر بادی کے ذمہ دار ہیں، علی ترین

لاہور (سپورٹس ڈیسک) ایک پوڈ کاسٹ پروگرام میں پی ایس ایل کے متعلق گفتگو کرتے ہوئے ملتان سلطان کے ما لک علی ترین کا کہنا تھا کہ پی سی بی کو یہ خار ہے کہ اسے پی ایس ایل پر مکمل کنٹرول حاصل نہیں کیونکہ پی ایس ایل میں فرنچائزز او دیگر لوگ بھی شامل ہوتے ہیں۔انہوں نے کہا کہ پی سی بی اس ایونٹ اور فرنچائزز کو اپنی مرضی کے مطابق چلانا چاہتا ہے، وہ سارا سال اپنے ایونٹس پر توجہ مرکوز رکھتا ہے، اسے پی ایس ایل کی پرواہ ہی نہیں ہے۔

علی ترین نے کہا کہ پی سی بی یہ نہیں سوچتا کہ پی ایس ایل بھی ہمارا ہی ایونٹ ہے، اس کے برعکس بورڈ حکام سوچتے ہیں کہ فرنچائزز کو ٹی وی ٹائم ملتا ہے جس سے انہی کا فائدہ ہوتا ہے، ہمارا تو کوئی فائدہ نہیں ہوتا۔انہوں نے کہا کہ ایسا نہیں کہ پی ایس ایل کی وجہ سے پی سی بی کو مالی فائدہ نہیں پہنچ رہا، اسے بہت مالی فائدہ حاصل ہورہا ہے لیکن چند لوگوں نے پی ایس ایل کو ذاتی انا کا مسئلہ بنا لیا ہے، پی ایس ایل میں سانپ بیٹھے ہوئے ہیں جو فیصلے کررہے ہیں۔

علی ترین نے اس سے پہلے بھی ایک بیان میں انہوں نے کہا تھا کہ پی سی بی نے اس شخص کو پی ایس ایل کی ذمہ داری سونپی ہے جو 20 سال سے کرکٹ بورڈ میں ہے۔ان کا کہنا تھا کہ ایسے لوگوں کو ذمہ داری سونپنی چاہیے تھی جنہوں نے پاکستان اور یو اے ای میں بہترین ایونٹس منعقد کرانے کا تجربہ ہوتا، ایک ایسے شخص کے ذمہ پی ایس ایل لگا دیا گیا ہے جو کم سے کم معیار پر پورا اترتا ہے۔

علی ترین نے کہا کہ علی ظفر کے وہی گانے آنے ہیں، ویسے ہی ہماری ڈرافٹ تقریب ہوگی، بالکل ویسے ہی ڈرافٹ میں پی سی بی کا ایک ملازم سوٹ پہن کر مائیک میں باتیں کرے گا، خدا کا خوف کریں، ایک ہی چیز کو بار بار دیکھنے کو مل رہی ہے۔