کرکٹ بورڈکی انضمام الحق کو بڑے عہدے کی پیشکش
چیئرمین پی سی بی مینجمنٹ کمیٹی ذکاء اشرف نے انضمام الحق سے بات کر کے اس خواہش کا اظہار کیا کہ وہ چیف سلیکٹر کا عہدہ سنبھالیں
لاہور (سپورٹس ڈیسک)کرکٹ بورڈکی انضمام الحق کو بڑے عہدے کی پیشکش ،رپورٹ کے مطابق پاکستان کرکٹ بورڈ نے انضمام الحق کو چیف سلیکٹر بننے کی پیشکش کر دی، مکی آرتھر اور گرانٹ بریڈبرن کی سلیکشن کمیٹی میں شمولیت کا امکان ہے۔ نجی ٹی وی جیو نیوز کے مطابق چیئرمین پی سی بی مینجمنٹ کمیٹی ذکاء اشرف نے انضمام الحق سے بات کر کے اس خواہش کا اظہار کیا کہ وہ چیف سلیکٹر کا عہدہ سنبھالیں۔ کرکٹ بورڈ کی ٹیکنیکل کمیٹی نے اپنا ہوم ورک مکمل کر لیا ہے جس کے تحت ڈومیسٹک کرکٹ سٹرکچر کا اعلان کیا جائے گا، ڈپارٹمنٹل کرکٹ بحال ہونے کا امکان ہے۔
بتایا گیا ہے کہ قومی کرکٹ سلیکشن کمیٹی کا اعلان بھی کئے جانے کا امکان ہے جس کے بعد سینٹرل کنٹریکٹس کا اعلان بھی کر دیا جائے گا۔ سلیکشن کمیٹی میں کوچز کی شمولیت پر فی الحال اتفاق پایا گیا ہے۔ ٹیم ڈائریکٹر مکی آرتھر اور ہیڈ کوچ گرانٹ بریڈبرن کی کمیٹی میں شمولیت کا امکان ہے۔
