کوپا امریکا 2024: ارجنٹینا سیمی فائنل میں پہنچ گیا
ایمی مارٹنیز نے یکے بعد دیگرے دو پینلٹیز سیو کرکے ٹیم کو فتح سے ہمکنار کیا

لاہور(سپورٹس ڈیسک)فٹ بال کے عالمی مقابلے جاری ہیں ے یہ ایسا دلچسپ کھیل ہے جس کی دھوم پوری دنیا میں ہے اور اسے پوری دنیا میں پسند بھی کیا جاتاہے۔ یہی وجہ ہے کہ ارجنٹینا کو پوری دنیا میں پزیرائی اسی کھیل کی وجہ سے ملی اور ان کے لیجنڈ کھلاڑی اسی کھیل میں مقبول تھے اور ہیں۔ان دنوں کوپا امریکا 2024 کے دلچسپ مقابلے جاری ہیں جہاں پہلے کوارٹر فائنل میں دفاعی چیمپیئن ارجنٹینا، پینلٹیز شوٹ آٹ پر ایکواڈور کو 2-4 سے شکست دے کر ٹورنامنٹ کے سیمی فائنل میں پہنچ گیا۔
پہلے ہاف کے 35ویں منٹ میں ارجنٹینا کو لیسانڈرو مارٹنیز کے گول کی بدولت برتری حاصل ہوئی جوکہ مقررہ وقت تک قائم رہی اور ارجنٹینا جیت کے قریب تھی لیکن انجری ٹائم کے پہلے ہی منٹ یعنی 1+90 منٹ میں ایکواڈور نے گول اسکور کرکے مقابلہ 1-1 سے برابر کردیا۔میچ میں 30 منٹ کا اضافی وقت ملا جس میں دونوں ٹیمیں گول اسکور نہیں کرپائیں، اور میچ پینلٹیز شوٹ آٹ پر چلا گیا۔لیونل میسی انجری کے باعث پیرو کے خلاف آخری گروپ میچ میں شرکت نہیں کرپائے تھے لیکن اس میچ میں انہوں نے قومی ٹیم کی طرف سے کھیلا لیکن وہ گول اسکور نہیں کرپائے۔
کپتان لیونل میسی سب سے پہلے پینلٹی لینے آئے لیکن انہوں نے پینلٹی کِک ضائع کردی، اس کے بعد فیفا ورلڈ کپ فائنل کے ہیرو ارجنٹائن گول کیپر ایمی مارٹینیز نے یکے بعد دیگرے دو پینلٹیز سیو کرکے 2-4 سے جیت کو یقینی بنایا۔رواں ہفتے یورو 2024 میں کرسٹیانو رونالڈو نے بھی اضافی وقت میں پینلٹی کِک مس کی تھی جوکہ ان کی ٹیم کو پینلٹی شوٹ آٹ سے پہلے ہی فتح دلوا سکتی تھی جس کے بعد وہ روئے بھی لیکن پینلٹی شوٹ آٹ پر سب سے پہلے پینلٹی لینے آئے اور اس پر گول اسکور کر کے شائقین سے پینلٹی کِک مس کرنے پر معذرت کی۔
واضح رہے کہ ہر چار سال بعد منعقد ہونے والے کوپا امریکا ٹورنامنٹ میں براعظم شمالی اور جنوبی امریکا کی 16 فٹبال ٹیمیں شرکت کرتی ہیں، امریکا میں کھیلے جانے والے اس ٹورنامنٹ کا آغاز 21 جون کو ہوا تھا جس کا فائنل 15 جولائی کو کھیلا جائے گا۔دوسری جانب یورپیئن چیمپیئن شپ کے مقابلے بھی جاری ہیں جن میں یورپ کی 24 فٹبال ٹیمیں شرکت کرتی ہیں، ٹورنامنٹ کا پہلا کوارٹر فائنل آج میزبان ملک جرمنی اور اسپین کے درمیان رات 9 بجے کھیلا جائے گا۔