کیاویرات کوہلی بالی وڈ میں قدم رکھنے والے ہیں؟

لاہور(سپورٹس ڈیسک) بالی ووڈ کے معروف کاسٹنگ ڈائریکٹر مکیش چھابڑیا نے بھارت کے مایہ ناز بلے باز ویرات کوہلی کو کرکٹ سے ریٹائرمنٹ کے بعد اداکاری کی دنیا میں قدم نہ رکھنے کا مشورہ دے دیا۔ حالیہ انٹرویو کے دوران میزبان نے کاسٹنگ ڈائریکٹر مکیش چھابڑیا سے سوال کیا کہ کیا ویرات کوہلی کرکٹ سے ریٹائرمنٹ کے بعد اداکاری کی دنیا میں قدم رکھنے والے ہیں؟

جواب میں مکیش چھابڑیا نے کہا کہ ویرات کوہلی پہلے ہی ایک عظیم اداکار ہیں، وہ پنجابی اور دہلی کے رہائشی ہیں، انہوں نے اپنی کامیابی کو بڑی ہی خوبصورتی سے سنبھالا ہے۔مکیش چھابڑیا نے کہا کہ ویرات کوہلی نے اپنی فٹنس، خوبصورتی، ذہنی و جسمانی صحت اور کرکٹ کی اپنی صلاحیتوں کو برقرار رکھا ہوا ہے، وہ نہ صرف ایک عظیم کرکٹر ہیں بلکہ ایک بہترین شوہر اور باپ بھی ہیں، وہ نوجوان نسل کے لیے رول ماڈل ہیں۔

انہوں نے کہا کہ ویرات کوہلی خوش اخلاق شخصیت کے مالک ہیں، وہ ڈانس بھی کرتے ہیں، مختلف لوگوں کی نقل بھی اتارتے ہیں اور حالات کے حساب سے مزاحیہ باتیں کرکے اپنے ساتھ موجود لوگوں کو خوش بھی کرتے ہیں۔ڈائریکٹر نے کہا کہ کوہلی بھارت کا فخر ہیں اور مجھے لگتا ہے کہ وہ ابھی جس مقام پر ہیں انہیں وہاں ہی رہنا چاہیے، وہ بطورِ کرکٹر ہی اپنی پہچان بناکر رکھیں، انہیں فلمی دنیا میں نہیں آنا چاہیے۔مکیش چھابڑیا نے مزید کہا کہ ویرات کو ریٹائرمنٹ کے بعد فلموں میں آنے کے بجائے اپنی کرکٹ پر ہی توجہ دینی چاہیے، وہ کوچ بن سکتے ہیں، اس کے علاوہ بھی کرکٹ کی دنیا میں دیگر فرائض سرانجام دے سکتے ہیں۔