آتش بازی‘ رنگین‘دلچسپ اورخطرناک کھیل‘ اس میں رنگینی کیسے آتی ہے؟

لاہور(ٹیکنالوجی ڈیسک)آتش بازی جتنا رنگین اور دلچسپ کھیل ہے یہ اتنا خطرناک بھی ہے تاہم یہ کھیل مدتوں سے چل رہا ہے اور اس میں بہت سی جدت آ چکی ہے۔کیا آپ نے کبھی سوچا کہ آتش بازی کو اتنا رنگین کیسے بنایا جاتا ہے؟ اس مضمون میں ہم اس کے پیچھے چھپی سائنس سے متعلق آپ کو بتاتے ہیں۔ہر آتش بازی کے اندر دھاتوں اور نمکیات کا ایک مخصوص مجموعہ ہوتا ہے جو اس بات کا تعین کرتا ہے کہ آتش بازی کے پھٹنے پر آسمان میں کون سے رنگ نمودار ہوں گے۔

جیسا کہ آتش بازی کے مواد میں موجود اسٹرونٹیم دھات سرخ رنگوں کو پھیلاتی ہے، بیریم چمکدار سبز رنگوں کی ذمہ دار ہے اور تانبا نیلے رنگوں کا مجموعہ پیدا کرتا ہے۔اسی طرح کلورین کچھ رنگوں کو چمکانے کا سبب بنتی ہے، پوٹاشیم نائٹریٹ اور سلفر آتش بازی کو جلانے میں مدد دیتے ہیں اور کلوریٹ اور نائٹریٹ رنگین دھماکوں کے لیے آکسیجن فراہم کرتے ہیں۔

ان دھاتوں اور نمکیات میں دیگر مرکبات بھی شامل کیے جاتے ہیں تاکہ رنگوں کو وسیع پیمانے پر پھٹنے میں مدد ملے۔اسی طرح کی سائنس زمینی مدار میں داخل ہونے والے شہابِ پتھروں کی بھی ہے۔ جب وہ مدار میں داخل ہوتے ہیں تو ان کی کیمیائی ساخت ان کے مختلف رنگوں میں ان کو چمکانے کا سبب بنتی ہے۔