سوشل ویب سائٹ ٹوئٹر سے چڑیا پُھر، کانٹے کا ”لوگو ”کیوں رکھا گیا ؟

سان فرانسیکو(مانیٹرنگ ڈیسک) معروف سماجی رابطے کی ویب سائٹ ٹوئٹر سے چڑیا پُھر جبکہ نیا لوگو کانٹے کا کیوں رکھا گیا ، اس حوالہ سے تمام تر تفصیلات منظر عام پر آگئی ہیں۔

انٹرنیشنل میڈیا کے مطابق ٹوئٹر کے مالک ایلون مسک نے بھی ٹویٹر پروفائل امیج کو اس لوگو میں تبدیل کر دیا اور ٹویٹر بائیو میں بھی ایکس ڈاٹ کام کا اضافہ کر دیا۔ گذشتہ روز ایلون مسک نے سوشل میڈیا پلیٹ فارم میں نیلے پرندے کا معروف لوگو تبدیل کرنے کا اعلان کیا تھا ۔ایک ٹوئٹ میں انہوں نے بتایا کہ بہت جلد ہم ٹوئٹر برانڈ اور تمام پرندوں کو خیرباد کہہ دیں گے، اگر ایکس لوگو اچھا ہوا تو وہ آج رات پوسٹ کیا جائے گا اور اسے 24 جولائی کو لائیو کر دیا جائے گا۔یہ اکتوبر 2022 میں ایلون مسک کی ملکیت میں جانے کے بعد ٹوئٹر کی سب سے بڑی تبدیلی ہوگی۔ اس تبدیلی کے بعد ٹوئٹر ایک خودمختار کمپنی نہیں رہے گی بلکہ اسے ایک نئی کمپنی ایکس کارپوریشن کا حصہ بنا دیا جائے گا۔ایلون مسک کی زندگی میں حرف ایکس بہت اہمیت رکھتا ہے۔اپریل 2023 میں ٹوئٹر کی نئی چیف ایگزیکٹو لینڈا یاکارینو کی تعیناتی کا اعلان کرتے ہوئے ایلون مسک نے کہا تھا کہ وہ اس پلیٹ فارم کو ایکس میں تبدیل کرنے کے لیے کام کریں گی، جو ایک سپر ایپ ہوگی۔

اکتوبر 2022 میں ایک ٹوئٹ میں انہوں نے کہا کہ ٹوئٹر کو خریدنے سے ایکس نامی ایوری تھنگ ایپ کی تشکیل کا عمل تیز ہو جائے گا۔ٹوئٹر کو خریدنے کے بعد ایلون مسک نے اس پلیٹ فارم میں متعدد تبدیلیاں کی ہیں جن میں ٹوئٹر بلیو سروس قابل ذکر ہے۔انہوں نے ایک ٹوئٹ میں ایکس کی تصویر بھی شیئر کی اور ایک صارف کی جانب سے لوگو کی تبدیلی کا جواب ہاں میں دیتے ہوئے کہا کہ ایسا بہت پہلے ہو جانا چاہیے تھا۔خیال رہے کہ اپریل میں عارضی طور پر ٹوئٹر کے روایتی لوگو کو ڈوگی کوائن کے کتے والے لوگو سے تبدیل کیا گیا تھا۔