ویڈیو گیم کھیلنے والوں کیلئے بری خبر، ”اسیسنز کریڈ شیڈوز” کی لانچنگ میں تاخیر کا اعلان

فرانس (مانیٹرنگ ڈیسک) ویڈیو گیم کھیلنے والوں کے لئے بری خبر’ فرانسیسی ویڈیو گیم کمپنی یوبی سافٹ نے اپنے آنے والے ویڈیو گیم اسیسنز کریڈ: شیڈوز کی لانچ میں تاخیر کا اعلان کیا ہے۔

انٹرنیشنل میڈیا کے مطابق یوبی سافٹ کے مطابق یہ گیم پہلے 15 نومبر 2024ء کو ریلیز کے لیے شیڈول کی گئی تھی تاہم اب سے آئندہ برس 14 فروری کو لانچ کی جائے گی۔ یوبی سافٹ کے مطابق اس تاخیر کی ایک وجہ یہ ہے کہ اسیسنز کریڈ سیریز کے اس نئے گیم کو بہتر بنانے کے لیے کمپنی کو مزید وقت درکار ہے جبکہ دوسری وجہ کمپنی کے تیار کردہ ایک اور گیم اسٹار وارز آٹ لاز کی خاطر خواہ فروخت نہ ہونا ہے۔ اسٹار واز آٹ لاز رواں سال اگست میں ریلیز ہوا تھا، یوبی سافٹ کو اسٹار وارز آٹ لاز کی خراب کارکردگی کے بعد مالی مشکلات کا بھی سامنا ہے۔

غیر ملکی خبررساں ایجنسی کے مطابق یوبی سافٹ کے شیئرز18 فیصد کم ہوئے اور اس سال کے آغاز سے اب تک اس کے شیئرز کی قیمت تقریبا 60 فیصد کم ہوچکی ہے۔فوربز کے مطابق یوبی سافٹ اس وقت انتہائی مشکل صورتحال میں ہے کیونکہ اس کے شیئرز کی قیمت 10 سال کی کم ترین سطح پر ہے۔ اسیسنز کریڈ شیڈوز کی لانچ میں تاخیر کے اعلان کے بعد یوبی سافٹ کے شیئرز جمعرات کو تقریبا20 فیصد گر گئے ہیں۔