شنگھائی تعاون تنظیم کا اجلاس،مولانا فضل الرحمن نے پی ٹی آئی سےاحتجاج ملتوی کرنےکی اپیل کردی

ٹنڈوالہٰ یار(کھوج نیوز)جمعیت علمائےاسلام کےسربراہ مولانا فضل الرحمن نےپاکستان تحریکِ انصاف سےشنگھائی تعاون تنظیم کے اجلاس تک احتجاج ملتوی کرنےکی اپیل کردی۔ٹنڈو الہ یارمیں میڈیا سےگفتگوکرتے ہوئےمولانا فضل الرحمن نے کہا ہے کہ پہلے بھی مظاہرے کے نتائج اچھے نہیں آئے تھے۔مولانا فضل الرحمن کا کہنا ہے کہ جو مسودہ حکومت کی طرف سے لایا گیا تھا ہم نے مسترد کردیا تھا، اس مسودے سے عدلیہ کمزوراورانسانی حقوق تباہ ہو جاتے۔
انہوں نے کہا کہ اسمبلی میں اس لیے نہیں کہ عوام کے مفاد کے خلاف قانون پاس کریں، جو چیزیں ہم نے مسترد کی ہیں، وہ واپس ہو چکی ہیں۔جے یو آئی کے سربراہ کا کہنا ہے کہ مسودے پر کافی ہم آہنگی ہو چکی ہے، بلاول بھٹو زرداری، نواز شریف اور پی ٹی آئی کی قیادت سے ملاقات کروں گا۔مولانا فضل الرحمن نے کہا کہ 18ویں ترمیم میں بھی ہمیں 9 مہینے لگ گئے تھے، آج کیا مسئلہ ہے جو ہم پر جلدی مسلط کی گئی، اتفاق رائے کے قریب پہنچ چکے ہیں۔