وزیر اعلی پنجاب کا ایک اور اقدام ،پنجاب کو کس چیز کا مرکز بنانے کا فیصلہ

لاہور (کھوج نیوز )وزیراعلی مریم نواز کا پنجاب کو تاریخ، تہذیب اور سیاحت کا ریجنل اور انٹرنیشنل مرکز بنانے کا فیصلہ کیا ہے ۔وزیر اعلی نے شاندار پنجاب میگا ٹورسٹ منصوبے کا آغاز کر دیا ہے ۔ پنجاب کے 170 تاریخی مقامات کو عالمی معیار کے سیاحتی مراکزمیں تبدیل کیا جائے گا۔ فہرست میں شامل مقامات کی میپنگ مکمل کرلی گئی ہے ۔جس میں101 گردوارے اور 53 گرجا گھر بھی شامل ہیں ۔

ترجمان پنجاب حکومت کے مطابق پنجاب ٹورازم اینڈ ہیریٹیج اتھارٹی بنانے کا فیصلہ کیا گیا ہے اور اس کے لیے باضابطہ منظوری کے لئے سمری کابینہ کو بھجوا دی گئی ہے ۔ تاریخ ورثہ اور سیاحت سے متعلق تمام ادارے اتھارٹی کے ماتحت ہوں گے۔منصوبے کی کامیابی یقینی بنانے کے لیے پہلی بار پنجاب ٹورازم اینڈ ہیریٹیج اتھارٹی ایکٹ 2024 بھی لاگو کر دیا گیا ہے۔اس کے علاوہ وزیراعلی نے پنجاب کے تاریخی مقامات کی تین مراحل میں بحالی کا منصوبہ سالانہ ترقیاتی پروگرام میں شامل کرلیا، جولائی میں ٹینڈرنگ شروع کرنے کی ہدایت بھی کی گئی ہے ۔

پہلا مرحلہ جون میں جبکہ دیگر تاریخی مقامات کی بحالی دوسرے اور تیسرے مرحلے میں مکمل ہوگی ۔16 سیاحتی منصوبوں کے پی سی ون کی فوری تیاری کی ہدایت، بانسرا گلی، ٹورسٹ ویلیج اور پارکس کی تعمیر بھی شامل ہے۔تاریخی شہر ٹیکسلا کو انٹرنیشنل ٹورسٹ سٹی بنانے کا اعلان، سویٹزرلینڈ کی طرز پر چھانگا مانگاکو جدید تفریح گاہ بنانے کی منظوری بھی دی گئی ہے ۔

اس کے علاوہ ٹیکسلا میں بودھ مت کے پیروکاروں کی سہولت کے لئے عبادت گاہیں اور سدھارتا کے نام سے نئی گیلریزبھی تعمیر کی جائیں گئیں۔ سکھ برادری کی سہولت کے لئے 46 غیرفعال گردوارے بحال کرنے کی بھی منظوری بھی دی گئی۔ اقلیتی برادری کے مذہبی و تاریخی مقامات کی حفاظت کا جامع نظام بنانے کی ہدایت بھی کی گئی۔سیاحت کے فروغ کے لئے بہترین سڑکیں تعمیر، انفراسٹرکچر کی مکمل اپ گریڈیشن اور عالمی معیار کی جدید سہولیات فراہم کی جائیں گی۔

‘دلکش لاہور” منصوبے کے لئے 400 ملین روپے جاری کیے گئے ہیں مال روڈ کی تاریخ محفوظ اور فوری مکمل کرنے کی ہدایت بھی کی گئی۔پہلی بار پورے پنجاب کو تاریخی اور سیاحتی مقامات کے لحاظ سے 9 حصوں میں تقسیم کر دیا گیا ۔پنجاب سیاحتی ٹریلزکے نام سے کی گئی تقسیم کے عنوان بابا گرو نانک دیو جی، کلچرل ڈسٹرکٹ مال روڈ لاہور، والڈ سٹی لاہور، گوجرانوالہ، ایمن آباد اور لاہور میں سکھ مذہب کے تاریخی مقامات، جی ٹی روڈ پر مغل دور کی یادگاریں، سالٹ رینج، بھاٹی گیٹ، ٹیکسالی گیٹ رکھے گئے ہیں ۔

وزیر اعلی پنجاب مریم نواز کا کہنا ہے کہ پنجاب میں ٹوریزم کی بحالی کے اس پروگرام کے ذریعے پنجاب کو بہترین ٹوریزم ڈیسٹینیشن بنائیں گے۔پوری دنیا کو پنجاب کا مہمان بنائیں گے، پانچ دریاں کی دھرتی کے تہذیبی رنگ دکھائیں گے۔ انھوں نے کہا کہ پنجاب میں کئی مذاہب، زمانوں اور ثقافتوں کے دریابہتے آئے ہیں، ہماری تاریخ، ثقافت اور ورثہ کی حفاظت آنے والی نسلوں کی امانت ہے۔ وزیر اعلی کا کہنا تھا کہ برصغیر میں اناج کا گھر کہلا نے والا پنجاب، دیگر مذاہب کے ماننے والوں کی روحانی تسکین کا گہوارہ بھی ہے۔ سیاحت کے فروغ سے معاشی ترقی میں مدد ملے گی، پنجاب اور پاکستان کا عالمی امیج دنیا میں نئی شان سے چمکے گا۔ اپنی تاریخ، تہذیب وثقافت، ہیروز اور روایات بھلانے والی اقوام مٹ جاتی ہیں، پنجاب کا تاریخی ورثہ اور ثقافت دنیا کے سامنے لا رہے ہیں۔