ن لیگ کے وزیر کا بڑا اقدام، پارٹی سمیت سب حیران بڑا دھچکا یا انقلابی فیصلہ؟

لاہور(کھوج نیوز) وزیرِ تعلیم پنجاب رانا سکندر حیات نے ایک تاریخی اقدام کرتے ہوئے اپنے بیٹے رانا محمد یوسف حیات کا داخلہ لاہور کے معروف سرکاری اسکول "نواز شریف سینٹ” میں کروا دیا۔ اس فیصلے کو عوامی سطح پر بے حد سراہا جا رہا ہے، کیونکہ یہ سرکاری اسکولوں کے معیار پر اعتماد بڑھانے میں مددگار ثابت ہوگا۔

وزیرِ تعلیم نے اس موقع پر کہا کہ حکومت پنجاب سرکاری اسکولوں کی بہتری کے لیے بھرپور اقدامات کر رہی ہے اور والدین کو چاہیے کہ وہ اپنے بچوں کو ان تعلیمی اداروں میں داخل کروائیں۔ انہوں نے مزید کہا کہ "اگر ہم سرکاری اسکولوں کو ترقی دینا چاہتے ہیں تو سب سے پہلے ہمیں خود ان پر اعتماد کرنا ہوگا۔ اسی سوچ کے تحت میں نے اپنے بیٹے کو سرکاری اسکول میں داخل کروانے کا فیصلہ کیا۔

یہ اقدام پنجاب میں تعلیمی اصلاحات کے حوالے سے ایک نئی مثال قائم کر سکتا ہے، کیونکہ عام طور پر سیاستدان اور اعلی عہدیداران اپنے بچوں کو مہنگے نجی اسکولوں میں بھیجنے کو ترجیح دیتے ہیں۔ تاہم، وزیرِ تعلیم کے اس فیصلے سے عوام میں سرکاری تعلیمی اداروں کے حوالے سے ایک مثبت پیغام جائے گا اور ان اداروں کی بہتری کی ضرورت پر بھی زور دیا جائے گا۔

ماہرین تعلیم کا کہنا ہے کہ اگر دیگر حکومتی عہدیدار بھی اسی طرح اپنے بچوں کو سرکاری اسکولوں میں داخل کروائیں، تو اس سے نہ صرف ان اداروں کی کارکردگی میں بہتری آئے گی بلکہ عوام کو بھی ان پر بھروسہ کرنے کی ترغیب ملے گی۔یہ فیصلہ حکومت کی تعلیمی پالیسیوں پر اعتماد کی بحالی کی ایک بڑی کوشش کے طور پر دیکھا جا رہا ہے، اور توقع کی جا رہی ہے کہ اس سے پنجاب کے سرکاری تعلیمی نظام میں مثبت تبدیلی آئے گی ۔