عمران خان کا بڑا اعتراف، حسن نواز کے حق میں دستبردار

اسلام آباد(کھوج نیوز) القادر ٹرسٹ کیس میں ایک نیا موڑ سامنے آیا ہے، جہاں سابق وزیر اعظم عمران خان کا ایک بڑا اعتراف سامنے آیا ہے۔ ذرائع کے مطابق، عمران خان نے کہا کہ ایسٹ ریکوری یونٹ (ERU) کو ملک ریاض کے خلاف انکوائری کے بجائے حسن نواز کے لندن اپارٹمنٹ پر تحقیقات کرنی چاہیے تھیں، تاکہ ملک ریاض بھی بچ جاتے اور ان کے لیے مشکلات بھی پیدا نہ ہوتیں۔

یہ بیان اس اہم کیس میں نئی بحث کو جنم دے سکتا ہے، جہاں برطانوی نیشنل کرائم ایجنسی (NCA) کی جانب سے ضبط کیے گئے 190 ملین پاؤنڈز پاکستان کے قومی خزانے میں جمع ہونے کے بجائے ملک ریاض کے بحریہ ٹاؤن کے جرمانے میں ایڈجسٹ کر دیے گئے تھے۔ ناقدین کا کہنا ہے کہ اس انکشاف سے عمران خان اور القادر ٹرسٹ کیس میں شامل دیگر افراد کے لیے مزید قانونی پیچیدگیاں پیدا ہوسکتی ہیں۔

دوسری جانب، مسلم لیگ(ن) کے رہنماؤں نے اس بیان پر سخت ردعمل دیا ہے، ان کا کہنا ہے کہ عمران خان نے خود اعتراف کر لیا ہے کہ وہ اپنے قریبی ساتھیوں کو بچانے اور سیاسی مخالفین کو نشانہ بنانے کے لیے اداروں کا غلط استعمال کرنا چاہتے تھے۔

سیاسی تجزیہ کاروں کا ماننا ہے کہ عمران خان کے اس بیان کے بعد القادر ٹرسٹ کیس مزید شدت اختیار کر سکتا ہے اور قانونی کارروائیاں تیزہوسکتی ہیں۔