پاکستانی طالبات کی عالمی کامیابی، AI کے میدان میں شاندار کارنامہ

اسلام آباد(ٹیکنالوجی ڈیسک ) پاکستان کی ہونہار طالبات نے عالمی سطح پر ملک کا نام روشن کر دیا۔ حال ہی میں ہونے والے بین الاقوامی ٹیکنالوجی مقابلے Global Techathon 2025 میں دو پاکستانی طالبات نے اپنی ذہانت اور تخلیقی صلاحیتوں کا مظاہرہ کرتے ہوئے پہلی پوزیشن حاصل کی۔

ان طالبات نے Menova کے نام سے ایک جدید مصنوعی ذہانت (AI) پر مبنی ٹول تیار کیا ہے، جو خواتین کو مینوپاز (Menopause) کے دوران درپیش جسمانی و ذہنی مسائل میں مدد فراہم کرتا ہے۔ یہ ٹول نہ صرف طبی رہنمائی فراہم کرتا ہے بلکہ اسے مختلف ثقافتی پس منظر رکھنے والی خواتین کے لیے موزوں بنایا گیا ہے، تاکہ وہ خود کو تنہا یا غیر محفوظ محسوس نہ کریں۔

Menova ٹول کی خاص بات یہ ہے کہ یہ خواتین کی نجی معلومات کو محفوظ رکھتے ہوئے ان کی صحت، جذبات اور ضروریات کو سمجھ کر مشورے فراہم کرتا ہے۔ یہ AI سسٹم مشرقی معاشروں میں موجود حساس پہلوؤں کو مدنظر رکھتے ہوئے ڈیزائن کیا گیا ہے، جو اسے عالمی سطح پر ایک منفرد اور انقلابی ایجاد بناتا ہے۔

ججز نے طالبات کے پراجیکٹ کو "جدید دور کی ضرورت” قرار دیتے ہوئے نہ صرف اسے ایوارڈ سے نوازا بلکہ اس کی ممکنہ عالمی سطح پر اپنانے کی بھی سفارش کی۔ پاکستان بھر سے طالبات کی اس کامیابی کو سراہا جا رہا ہے اور ماہرین تعلیم کا کہنا ہے کہ یہ کامیابی نوجوان نسل کی ٹیکنالوجی میں بڑھتی دلچسپی اور صلاحیتوں کا منہ بولتا ثبوت ہے۔